ਭਾਰਤ ਨੇ ਸ਼੍ਰੀਲੰਕਾ ਨੂੰ 144 ਦੌਡ਼ਾਂ ਨਾਲ ਹਰਾ ਏਸ਼ੀਆ ਕੱਪ ‘ਤੇ ਕੀਤਾ ਕਬਜਾ

ਢਾਕਾ – ਐਤਵਾਰ ਨੂੰ ਖੇਡੇ ਗਏ ਸ਼ੇਰੇ ਬੰਗਲਾ ਰਾਸ਼ਟਰੀ ਸਟੇਡੀਅਮ ਵਿਚ ਅੰਡਰ-19 ਏਸ਼ੀਆ ਕੱਪ ਦੇ ਫਾਈਨਲ ਵਿਚ ਭਾਰਤ ਨੇ ਸ਼੍ਰੀਲੰਕਾ ਨੂੰ 144 ਦੌੜਾਂ ਨਾਲ ਹਰਾ ਕੇ ਏਸ਼ੀਆ ਕੱਪ ਅੰਡਰ-19 ‘ਤੇ ਕਬਜਾ ਕਰ ਲਿਆ ਹੈ। ਭਾਰਤ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਸੀ। ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਭਾਰਤ ਨੇ ਸ਼੍ਰੀਲੰਕਾ ਨੂੰ 305 ਦੌੜਾਂ ਦਾ ਟੀਚਾ ਦਿੱਤਾ। ਟੀਚੇ ਦਾ ਪਿੱਛਾ ਕਰਦਿਆਂ ਸ਼੍ਰੀਲੰਕਾ ਦੀ ਪੂਰੀ ਟੀਮ 160 ਦੌੜਾਂ ਹੀ ਬਣਾ ਸਕੀ। ਭਾਰਤ ਵਲੋਂ ਸਭ ਤੋਂ ਵੱਧ ਦੌੜਾਂ ਯਸ਼ਵੀ ਜੈਸਵਾਲ ਨੇ ਬਣਾਈਅ ਉਸ ਨੇ 113 ਗੇਂਦਾਂ ਵਿਚ 8 ਚੌਕੇ ਅਤੇ 1 ਛੱਕੇ ਦੀ ਮਦਦ ਨਾਲ 85 ਦੌੜਾਂ ਦੀ ਪਾਰੀ ਖੇਡੀ। ਉਸ ਤੋਂ ਬਾਅਦ ਪ੍ਰਭ ਸਿਮਰਨ ਸਿੰਘ ਨੇ 65, ਅਨੁਜ ਰਾਵਤ ਨੇ 57 ਅਤੇ ਆਯੁਸ਼ੀ ਬਦੋਨੀ ਨੇ 52 ਦੌੜਾਂ ਦੀ ਪਾਰੀ ਖੇਡੀ। ਭਾਰਤ ਵਲੋਂ ਸਭ ਤੋਂ ਕਾਮਯਾਬ ਗੇਂਦਬਾਜ਼ੀ ਕਰਨ ਵਾਲਾ ਹਰਸ਼ ਤਿਆਗੀ ਰਿਹਾ। ਉਸ ਨੇ 10 ਓਵਰਾਂ ਵਿਚ 38 ਦੌੜਾਂ ਖਰਚ ਕਰ ਕੇ 6 ਵਿਕਟਾਂ ਹਾਸਲ ਕੀਤੀਆਂ। ਸਿਧਾਰਥ ਦੇਸਾਈ ਨੇ 2 ਜਦਕਿ ਮੋਹਿਤ ਜਾਂਗਰਾ ਨੇ 1 ਵਿਕਟ ਹਾਸਲ ਕੀਤੀ।