ਸਾਇਨਾ ਨੇਹਵਾਲ ਵਿਸ਼ਵ ਚੈਂਪੀਅਨਸ਼ਿਪ ਤੋਂ ਬਾਹਰ

ਨਾਨਚਿੰਗ – ਸਾਬਕਾ ਉਪ ਜੇਤੂ ਅਤੇ ਦਸਵਾਂ ਦਰਜਾ ਪ੍ਰਾਪਤ ਸਾਇਨਾ ਨੇਹਵਾਲ ਆਪਣੀ ਪੁਰਾਣੀ ਵਿਰੋਧੀ ਅਤੇ ਦੋ ਵਾਰ ਦੀ ਚੈਂਪੀਅਨ ਸਪੇਨ ਦੀ ਕੈਰੋਲੀਨਾ ਮਾਰਿਨ ਦੀ ਚੁਣੌਤੀ ਪਾਰ ਨਹੀਂ ਕਰ ਸਕੀ ਅਤੇ ਅੱਜ ਇੱਥੇ ਕੁਆਰਟਰ ਫਾਈਨਲ ਮੁਕਾਬਲੇ ਵਿੱਚ ਹਾਰ ਕੇ ਵਿਸ਼ਵ ਬੈਡਮਿੰਟਨ ਚੈਂਪੀਅਨਸ਼ਿਪ ਤੋਂ ਬਾਹਰ ਹੋ ਗਈ। ਟੂਰਨਾਮੈਂਟ ਵਿੱਚ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਕਰ ਰਹੀ ਸਾਇਨਾ ਅਤੇ ਸਤਵਾਂ ਦਰਜਾ ਪ੍ਰਾਪਤ ਮੈਰੀਨ ਵਿਚਾਲੇ ਇਹ ਮੁਕਾਬਲਾ ਪੂਰੀ ਤਰ੍ਹਾਂ ਇਕਪਾਸੜ ਰਿਹਾ। ਮਾਰਿਨ ਨੇ ਸਾਇਨਾ ਖ਼ਿਲਾਫ਼ ਸਿਰਫ਼ 31 ਮਿੰਟ ਵਿੱਚ 21-6, 21-11 ਨਾਲ ਜਿੱਤ ਦਰਜ ਕੀਤੀ। ਇਸ ਹਾਰ ਮਗਰੋਂ ਸਾਇਨਾ ਦਾ ਮਾਰਿਨ ਖ਼ਿਲਾਫ਼ 5-5 ਦਾ ਕਰੀਅਰ ਰਿਕਾਰਡ ਹੋ ਗਿਆ ਹੈ। ਦੋਵਾਂ ਵਿਚਾਲੇ ਆਖ਼ਰੀ ਵਾਰ ਟੱਕਰ ਪਿਛਲੇ ਸਾਲ ਅਕਤੂਬਰ ਦੌਰਾਨ ਡੈਨਮਾਰਕ ਵਿੱਚ ਹੋਈ ਸੀ, ਜਿੱਥੇ ਸਾਇਨਾ ਨੇ ਜਿੱਤ ਦਰਜ ਕੀਤੀ ਸੀ। ਮਿਕਸਡ ਡਬਲਜ਼ ਵਿੱਚ ਅਸ਼ਵਨੀ ਪੋਨੱਪਾ ਅਤੇ ਸਾਤਵਿਕ ਸਾਈਰਾਜ ਰੰਕੀਰੈਡੀ ਦੀ ਜੋੜੀ ਨੂੰ ਵੀ ਆਖ਼ਰੀ ਅੱਠ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਸੀਨੀਅਰ ਦਰਜਾ ਪ੍ਰਾਪਤ ਝੇਂਗ ਸਿਵੇਈ ਅਤੇ ਹੁਆਂਗ ਯਾਕਿਯੋਂਗ ਦੀ ਚੀਨੀ ਜੋੜੀ ਨੇ ਭਾਰਤੀ ਜੋੜੀ ਨੂੰ ਸਿਰਫ਼ 36 ਮਿੰਟ ਵਿੱਚ 17-21, 10-21 ਨਾਲ ਹਾਰ ਕੇ ਆਖ਼ਰੀ ਚਾਰ ਵਿੱਚ ਥਾਂ ਬਣਾ ਲਈ।