ਅਮਰੀਕਾ ‘ਚ ਪੁਲਸ ਕਰਮਚਾਰੀਆਂ ‘ਤੇ ਗੋਲੀਬਾਰੀ, ਇਕ ਦੀ ਮੌਤ

ਵਾਸ਼ਿੰਗਟਨ – ਅਮਰੀਕਾ ਦੇ ਦੱਖਣੀ ਕੈਰੋਲੀਨਾ ਸੂਬੇ ਵਿਚ ਇਕ ਵਿਅਕਤੀ ਨੇ 7 ਪੁਲਸ ਕਰਮਚਾਰੀਆਂ ਨੂੰ ਨਿਸ਼ਾਨਾ ਬਣਾ ਕੇ ਗੋਲੀਬਾਰੀ ਕੀਤੀ, ਜਿਸ ਵਿਚ ਇਕ ਦੀ ਮੌਤ ਹੋ ਗਈ। ਇਹ ਹਮਲਾ ਇੰਨਾ ਖਤਰਨਾਕ ਸੀ ਕਿ ਪੁਲਸ ਕਰਮਚਾਰੀਆਂ ਨੂੰ ਜ਼ਖਮੀ ਵਿਅਕਤੀਆਂ ਨੂੰ ਲੈ ਜਾਣ ਲਈ ਬੁਲੇਟ ਪਰੂਫ ਗੱਡੀ ਦੀ ਵਰਤੋਂ ਕਰਨੀ ਪਈ। ਜ਼ਖਮੀਆਂ ਵਿਚ ਦੋ ਨਗਰ ਪੁਲਸ ਅਧਿਕਾਰੀ ਹਨ ਜਦਕਿ 3 ਫਲੋਰੇਂਸ ਕਾਊਂਟੀ ਸ਼ੇਰਿਫ ਦੇ ਪ੍ਰਤੀਨਿਧੀ ਹਨ। ਫਲੋਰੇਂਸ ਕਾਊਂਟੀ ਦੇ ਸ਼ੇਰਿਫ ਮੇਜਰ ਮਾਈਕ ਨੁਨ ਨੇ ਦੱਸਿਆ ਕਿ ਹਮਲਾ ਕਰਨ ਵਾਲੇ ਵਿਅਕਤੀ ਨੇ ਬੁੱਧਵਾਰ ਦੁਪਹਿਰ ਨੂੰ ਆਪਣੇ ਫਲੋਰੇਂਸ ਸਥਿਤ ਘਰ ਵਿਚ 2 ਘੰਟੇ ਤੱਕ ਬੱਚਿਆਂ ਨੂੰ ਬੰਧਕ ਬਣਾ ਕੇ ਰੱਖਿਆ। ਸ਼ੱਕੀ ਨੂੰ ਹਿਰਾਸਤ ਵਿਚ ਲੈਣ ਦੇ ਬਾਅਦ ਬੱਚਿਆਂ ਦੀ ਸੁਰੱਖਿਅਤ ਰਿਹਾਈ ਸੰਭਵ ਹੋ ਸਕੀ। ਸ਼ੇਰਿਫ ਅਤੇ ਪੁਲਸ ਅਧਿਕਾਰੀ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਰੋ ਪਏ। ਫਲੋਰੇਂਸ ਪੁਲਸ ਮੁਖੀ ਐਲਨ ਹੈਡਲਰ ਨੇ ਕਿਹਾ,”ਮੈਂ ਚਾਹੁੰਦਾ ਹਾਂ ਕਿ ਲੋਕ ਇਸ ਘਟਨਾ ਵਿਚ ਮਰਨ ਵਾਲੇ ਬਹਾਦੁਰ ਪੁਲਸ ਅਫਸਰ ਦੇ ਪਰਿਵਾਰ ਲਈ ਪ੍ਰਾਰਥਨਾ ਕਰਨ।” ਫਲੋਰੇਂਸ ਸ਼ਹਿਰ ਦੇ ਬੁਲਾਰੇ ਜੌਨ ਵੁਕੇਲਾ ਨੇ ਬੁੱਧਵਾਰ ਦੇਰ ਰਾਤ ਟੇਰੇਂਸ ਕੈਰਵੇ (52) ਦੀ ਮੌਤ ਦੀ ਪੁਸ਼ਟੀ ਕੀਤੀ ਸੀ।