ਅਮਰੀਕਾ ਪਹਿਲਾਂ ਗੋਲੀ ਮਾਰ ਕੀਤਾ ਜ਼ਖਮੀ ਫਿਰ ਉਸੇ ਵਿਅਕਤੀ ਦਾ ਹਸਪਤਾਲ ਜਾ ਕੇ ਕੀਤਾ ਕਤਲ

ਕੰਸਾਸ – ਅਮਰੀਕਾ ਦੇ ਸ਼ਹਿਰ ਕੰਸਾਸ ‘ਚ ਇਕ ਬੰਦੂਕਧਾਰੀ ਹਮਲਾਵਰ ਨੇ ਇਕ ਵਿਅਕਤੀ ਅਤੇ ਔਰਤ ਨੂੰ ਗੋਲੀਆਂ ਮਾਰ ਕੇ ਜ਼ਖ਼ਮੀ ਕੀਤਾ। ਬਾਅਦ ‘ਚ ਜ਼ਖਮੀ ਵਿਅਕਤੀ ਅਤੇ ਔਰਤ ਨੂੰ ਨੇੜੇ ਦੇ ਇਕ ਹਸਪਤਾਲ ‘ਚ ਦਾਖਲ ਕਰਾਇਆ ਗਿਆ ਤਾਂ ਹਮਲਾਵਰ ਨੇ ਕਰੀਬ 4-5 ਕਿ. ਮੀ. ਤੱਕ ਉਨ੍ਹਾਂ ਦਾ ਪਿੱਛਾ ਕੀਤਾ ਅਤੇ ਹਸਪਤਾਲ ਪਹੁੰਚ ਕੇ ਜ਼ਖ਼ਮੀ ਹੋਏ ਵਿਅਕਤੀ ‘ਤੇ ਮੁੜ ਗੋਲੀਆਂ ਚਲਾਈਆਂ ਅਤੇ ਉਸ ਦਾ ਕਤਲ ਕਰ ਦਿੱਤਾ, ਜਿਸ ਤੋਂ ਬਾਅਦ ਉਸ ਨੇ ਆਪ ਵੀ ਆਤਮ-ਹੱਤਿਆ ਕਰ ਲਈ। ਇਸ ਸਬੰਧੀ ਪੁਲਸ ਨੇ ਦੱਸਿਆ ਕਿ ਇਹ ਘਟਨਾਂ ਦੇਰ ਰਾਤ 11:30 ਵਜੇ ਯੂਨੀਵਰਸਿਟੀ ਆਫ਼ ਕਨਸਾਸ ਹਸਪਤਾਲ ‘ਚ ਵਾਪਰੀ। ਪੁਲਸ ਨੇ ਦੱਸਿਆ ਕਿ ਹਮਲਾਵਰ ਨੇ 28 ਸਾਲਾ ਡੋਮੀਨਿਕ ਗਾਰਸੀਆ ਨਾਂ ਅਤੇ ਇਕ ਅਣਪਛਾਤੀ ਔਰਤ ‘ਤੇ ਗੋਲੀਆਂ ਚਲਾ ਕੇ ਦੋਹਾਂ ਨੂੰ ਜ਼ਖ਼ਮੀ ਕਰ ਦਿੱਤਾ ਸੀ। ਪਰ ਜ਼ਖ਼ਮੀ ਹਾਲਤ ‘ਚ ਗਾਰਸੀਆ ਉਸ ਔਰਤ ਨੂੰ ਨਾਲ ਲੈ ਕੇ ਉਥੋਂ ਬਚ ਨਿਕਲਿਆ ਅਤੇ ਯੂਨੀਵਰਸਿਟੀ ਆਫ਼ ਕਨਸਾਸ ਹਸਪਤਾਲ ਪਹੁੰਚਿਆ। ਹਮਲਾਵਰ ਨੇ ਹਸਪਤਾਲ ਤੱਕ ਵੀ ਦੋਹਾਂ ਦਾ ਪਿੱਛਾ ਕੀਤਾ ਅਤੇ ਜਦੋਂ ਗਾਰਸੀਆ ਹਸਪਤਾਲ ਦੇ ਮੁੱਖ ਦਰਵਾਜ਼ੇ ਰਾਹੀਂ ਦਾਖ਼ਲ ਹੋ ਰਿਹਾ ਸੀ ਤਾਂ ਪਿੱਛੋਂ ਹਮਲਾਵਰ ਨੇ ਉਸ ‘ਤੇ ਗੋਲੀਬਾਰੀ ਕੀਤੀ, ਜਿਸ ਤੋਂ ਬਾਅਦ ਉਸ ਨੇ ਆਪਣੇ ਆਪ ਨੂੰ ਵੀ ਗੋਲੀ ਮਾਰ ਲਈ। ਪੁਲਸ ਵੱਲੋਂ ਜ਼ਖਮੀ ਔਰਤ ਦੀ ਪਛਾਣ ਅਜੇ ਤੱਕ ਜਨਤਕ ਨਹੀਂ ਕੀਤੀ ਅਤੇ ਉਥੇ ਡਾਕਟਰਾਂ ਉਸ ਦੀ ਹਾਲਤ ਸਥਿਰ ਦੱਸੀ ਹੈ।