ਅਮਰੀਕਾ ਦੇ ਦੋ ਫੌਜੀ ਜਹਾਜ਼ ਦੁਰਘਟਨਾ ਦੇ ਸ਼ਿਕਾਰ, 6 ਫੌਜੀ ਲਾਪਤਾ

ਟੋਕੀਓ – ਜਾਪਾਨ ‘ਚ ਤੇਲ ਭਰਨ ਦੌਰਾਨ ਵੀਰਵਾਰ ਨੂੰ ਅਮਰੀਕਾ ਦੇ ਦੋ ਫੌਜੀ ਜਹਾਜ਼ ਦੁਰਘਟਨਾ ਦੇ ਸ਼ਿਕਾਰ ਹੋ ਗਏ। ਹਾਦਸੇ ਦੇ ਬਾਅਦ 6 ਅਮਰੀਕੀ ਅਧਿਕਾਰੀ ਲਾਪਤਾ ਹਨ। ਦੋਹਾਂ ਦੇਸ਼ਾਂ ਦੇ ਅਧਿਕਾਰੀਆਂ ਨੇ ਇਸ ਦੀ ਜਾਣਕਾਰੀ ਦਿੱਤੀ ਹੈ। ਜਾਪਾਨ ‘ਚ ਅਮਰੀਕੀ ਮਰੀਨਸ ਵਲੋਂ ਜਾਰੀ ਬਿਆਨ ਮੁਤਾਬਕ ਐੱਫ-18 ਲੜਾਕੂ ਜਹਾਜ਼ ਅਤੇ ਸੀ-130 ਟੈਂਕਰ ਦੁਰਘਟਨਾਗ੍ਰਸਤ ਹੋਏ ਹਨ। ਹਾਦਸਾ ਜਾਪਾਨ ਦੇ ਸਮੁੰਦਰੀ ਤਟ ਨੇੜੇ 200 ਮੀਲ ਦੂਰ ਦੇਰ ਰਾਤ ਨੂੰ 2 ਵਜੇ ਵਾਪਰਿਆ। ਅਮਰੀਕੀ ਰੱਖਿਆ ਵਿਭਾਗ ਦੇ ਇਕ ਅਧਿਕਾਰੀ ਨੇ ਦੱਸਿਆ ਕਿ ਦੱਖਣੀ ਜਾਪਾਨ ਦੇ ਇਵਾਕੁਨੀ ਸਥਿਤ ਮਰੀਨ ਕੋਰ ਏਅਰ ਸਟੇਸ਼ਨ ਤੋਂ ਉਡਾਣ ਭਰਨ ਮਗਰੋਂ ਜਹਾਜ਼ ਹਾਦਸਾਗ੍ਰਸਤ ਹੋ ਗਏ। ਜਾਪਾਨ ਦੀ ਸੈਲਫ ਡਿਫੈਂਸ ਫੋਰਸ ਦੇ ਇਕ ਬੁਲਾਰੇ ਨੇ ਕਿਹਾ ਕਿ ਇਕ ਹਵਾਈ ਫੌਜੀ ਨੂੰ ਬਚਾ ਲਿਆ ਗਿਆ ਹੈ ਪਰ ਬਾਕੀ ਅਜੇ ਲਾਪਤਾ ਹਨ। ਡਾਕਟਰ ਬਚਾਏ ਗਏ ਫੌਜੀ ਦੀ ਜਾਂਚ ਕਰ ਰਹੇ ਹਨ। ਜਾਪਾਨ ਦੇ ਇਕ ਅਧਿਕਾਰੀ ਮੁਤਾਬਕ ਅਜਿਹਾ ਮੰਨਿਆ ਜਾ ਰਿਹਾ ਹੈ ਕਿ ਸੀ-130 ‘ਚ 5 ਕਰਮਚਾਰੀ ਸਵਾਰ ਸਨ। ਜਾਪਾਨ ਨੇ ਲਾਪਤਾ ਹਵਾਈ ਫੌਜੀਆਂ ਦੀ ਖੋਜ ‘ਚ 7 ਜਹਾਜ਼ਾਂ ਨੂੰ ਤਾਇਨਾਤ ਕੀਤਾ ਹੈ ਅਤੇ ਅਮਰੀਕਾ ਨੇ ਇਸ ਮਿਹਰਬਾਨੀ ਲਈ ਉਨ੍ਹਾਂ ਦਾ ਧੰਨਵਾਦ ਕੀਤਾ ਹੈ।