ਅਮਰੀਕਾ ਵਿੱਚ ਅਪਾਰਟਮੈਂਟ ਬਿਲਡਿੰਗ ਤੇ ਕ੍ਰੇਨ ਡਿੱਗਣ ਨਾਲ ਇਕ ਦੀ ਮੌਤ 6 ਜ਼ਖਮੀ

ਵਾਸ਼ਿੰਗਟਨ – ਅਮਰੀਕਾ ਦੇ ਡਾਊਨਟਾਊਨ ਡਲਾਸ ਵਿਚ ਇਕ ਅਪਾਰਟਮੈਂਟ ਬਿਲਡਿੰਗ ਤੇ ਕ੍ਰੇਨ ਡਿੱਗ ਪਈ| ਇਸ ਹਾਦਸੇ ਵਿਚ ਇਕ ਮਹਿਲਾ ਦੀ ਮੌਤ ਹੋ ਗਈ ਜਦਕਿ 6 ਵਿਅਕਤੀ ਜ਼ਖਮੀ ਹੋ ਗਏ| ਜ਼ਖਮੀਆਂ ਵਿਚੋਂ ਦੋ ਵਿਅਕਤੀਆਂ ਦੀ ਹਾਲਤ ਗੰਭੀਰ ਹੈ, ਤਿੰਨ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ ਜਦਕਿ ਇਕ ਨੂੰ ਮਾਮੂਲੀ ਸੱਟ ਲੱਗੀ ਹੈ|ਕ੍ਰੇਨ ਡਿੱਗਣ ਦਾ ਕਾਰਨ ਮੌਸਮ ਦਾ ਖਰਾਬ ਹੋਣਾ ਦੱਸਿਆ ਗਿਆ ਹੈ| ਮਾਮਲੇ ਤੇ ਫਾਇਰ ਬਚਾਅ ਮੁਹਿੰਮ ਦੇ ਬੁਲਾਰੇ ਜੇਸਨ ਇਵਾਨਸ ਦਾ ਕਹਿਣਾ ਹੈ ਕਿ ਕ੍ਰੇਨ ਐਲਨ ਸਿਟੀ ਲਾਈਟਸ ਅਪਾਰਟਮੈਂਟ ਕੰਪਲੈਕਸ ਤੇ ਡਿੱਗੀ| ਇਸ ਨਾਲ ਇਮਾਰਤ ਦੇ ਪੂਰਬੀ ਹਿੱਸੇ ਨੂੰ ਭਾਰੀ ਨੁਕਸਾਨ ਪਹੁੰਚਿਆ| ਸੋਸ਼ਲ ਮੀਡੀਆ ਤੇ ਘਟਨਾ ਸਬੰਧੀ ਵੀਡੀਓ ਵਾਇਰਲ ਹੋ ਰਹੀ ਹੈ| ਜਿਕਰਯੋਗ ਹੈ ਕਿ ਤੇਜ਼ ਹਵਾ ਚੱਲਣ ਕਾਰਨ ਕ੍ਰੇਨ ਇਮਾਰਤ ਤੇ ਡਿੱਗ ਪਈ, ਜਿਸ ਤੋਂ ਬਾਅਦ ਮਲਬਾ ਆਲੇ-ਦੁਆਲੇ ਖਿੱਲਰ ਗਿਆ| ਦਮਕਲ ਕਰਮੀ ਇਮਾਰਤ ਵਿਚ ਲਾਪਤਾ ਅਤੇ ਜ਼ਖਮੀ ਲੋਕਾਂ ਦੀ ਤਲਾਸ਼ ਵਿਚ ਲੱਗੇ ਹੋਏ ਹਨ| ਰਾਸ਼ਟਰੀ ਮੌਸਮ ਸਰਵਿਸ ਮੁਤਾਬਕ ਕ੍ਰੇਨ ਦੁਪਹਿਰ ਕਰੀਬ 2 ਵਜੇ ਡਿੱਗੀ|