ਉੱਤਰੀ ਕੋਰੀਆ ‘ਤੇ ਟਰੰਪ ਦੇ ਬਿਆਨ ਨੂੰ ਚੀਨ ਨੇ ਦੱਸਿਆ ‘ਗੈਰ-ਜ਼ਿੰਮੇਵਾਰ’

ਵਾਸ਼ਿੰਗਟਨ – ਚੀਨ ਨੇ ਆਖਿਆ ਹੈ ਕਿ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦਾ ਇਹ ਕਹਿਣਾ ਬੇਹੱਦ ਗੈਰ-ਜ਼ਿੰਮੇਵਾਰ ਹੈ ਕਿ ਅਸੀਂ ਪ੍ਰਮਾਣੂ ਪ੍ਰੋਗਰਾਮ ਨੂੰ ਲੈ ਕੇ ਉੱਤਰੀ ਕੋਰੀਆ ‘ਤੇ ਦਬਾਅ ਨਹੀਂ ਪਾ ਰਹੇ। ਡੋਨਾਲਡ ਟਰੰਪ ਨੇ ਸ਼ੁੱਕਰਵਾਰ ਨੂੰ ਟਵੀਟ ਕੀਤਾ ਸੀ ਕਿ ਚੀਨ ਅਮਰੀਕਾ ਨਾਲ ਵਪਾਰਕ ਤਣਾਅ ਵੱਧਣ ਕਾਰਨ ਉੱਤਰੀ ਕੋਰੀਆ ਦੇ ਮਾਮਲੇ ‘ਚ ਉਨ੍ਹਾਂ ਦੀ ਮਦਦ ਨਹੀਂ ਕਰ ਰਿਹਾ। ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਨੇ ਇਸ ਦਾ ਜਵਾਬ ਦਿੰਦੇ ਹੋਏ ਆਖਿਆ ਕਿ ਟਰੰਪ ਦਾ ਇਹ ਬਿਆਨ ਬੁਨਿਆਦੀ ਤੱਥਾਂ ਦੇ ਉਲਟ ਹੈ ਅਤੇ ਚੀਨ ਇਸ ਮਸਲੇ ‘ਤੇ ਕਾਫੀ ਚਿੰਤਤ ਹੈ। ਵੀਰਵਾਰ ਨੂੰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਈਕ ਪੋਂਪੀਓ ਦੀ ਉੱਤਰੀ ਕੋਰੀਆ ਦੀ ਪ੍ਰਸਤਾਵਿਤ ਯਾਤਰਾ ਨੂੰ ਰੱਦ ਕਰ ਦਿੱਤਾ ਸੀ। ਟਰੰਪ ਦਾ ਆਖਣਾ ਸੀ ਕਿ ਉੱਤਰੀ ਕੋਰੀਆ ਦੇ ਪ੍ਰਮਾਣੂ ਪ੍ਰੋਗਰਾਮ ਨੂੰ ਖਤਮ ਕਰਨ ‘ਚ ਬੇਹੱਦ ਘੱਟ ਕੰਮ ਕੀਤੇ ਗਏ ਹਨ। ਹਾਲਾਂਕਿ ਜੂਨ ‘ਚ ਉੱਤਰੀ ਕੋਰੀਆ ਦੇ ਸੁਪਰੀਮ ਲੀਡਰ ਕਿਮ ਜੋਂਗ ਉਨ ਨਾਲ ਹੋਈ ਗੱਲਬਾਤ ਤੋਂ ਬਾਅਦ ਡੋਨਾਲਡ ਟਰੰਪ ਨੇ ਆਖਿਆ ਸੀ ਕਿ ਅਮਰੀਕਾ ਲਈ ਉੱਤਰੀ ਕੋਰੀਆ ਹੁਣ ਪ੍ਰਮਾਣੂ ਖਤਰਾ ਨਹੀਂ ਰਿਹਾ। ਪਰ ਉਦੋਂ ਤੋਂ ਲੈ ਕੇ ਅਜੇ ਤੱਕ ਕੋਈ ਅਜਿਹੀ ਰਿਪੋਰਟ ਸਾਹਮਣੇ ਨਹੀਂ ਆਈ ਹੈ ਕਿ ਜਿਸ ‘ਚ ਦਾਅਵਾ ਕੀਤਾ ਗਿਆ ਹੋਵੇ ਕਿ ਉੱਤਰੀ ਕੋਰੀਆ ਨੇ ਅਜੇ ਵੀ ਆਪਣੇ ਪ੍ਰਮਾਣੂ ਹਥਿਆਰਾਂ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰ ਦਿੱਤਾ ਹੈ। ਹਾਲ ਹੀ ‘ਚ ਚਿਤਾਵਨੀ ਇਕ ਅਣਪਛਾਤੇ ਅਮਰੀਕੀ ਅਧਿਕਾਰੀ ਵੱਲੋਂ ਆਈ, ਜਿਸ ਨੇ ਅਮਰੀਕੀ ਅਖਬਾਰ ਨਾਲ ਗੱਲਬਾਤ ਕਰਦੇ ਹੋਏ ਦਾਅਵਾ ਕੀਤਾ ਕਿ ਉੱਤਰੀ ਕੋਰੀਆ ਨਵੀਂ ਇੰਟਰਕਾਂਨੇਂਟਲ ਬੈਲੇਸਟਿਕ ਮਿਜ਼ਾਈਲਾਂ ਦੇ ਨਿਰਮਾਣ ਦਾ ਕੰਮ ਕਰ ਰਿਹਾ ਹੈ। ਸੰਯੁਕਤ ਰਾਸ਼ਟਰ ਦੀ ਪ੍ਰਮਾਣੂ ਏਜੰਸੀ (ਆਈ. ਏ. ਈ. ਏ.) ਨੇ ਵੀ ਇਹੀਂ ਕਿਹਾ ਕਿ ਉੱਤਰੀ ਕੋਰੀਆ ਦਾ ਪ੍ਰਮਾਣੂ ਪ੍ਰੋਗਰਾਮ ਜਾਰੀ ਹੈ। ਇਸ ਵਿਚਾਲੇ ਦੱਖਣੀ ਕੋਰੀਆ ਅਤੇ ਉੱਤਰੀ ਕੋਰੀਆ ਨੇਤਾਵਾਂ ਵਿਚਾਲੇ ਤਾਂ ਕਈ ਮੁਲਾਕਾਤਾਂ ਹੋਈਆਂ ਹੋਣਗੀਆਂ ਪਰ ਇਕ ਵੱਡੇ ਆਯੋਜਨ ਦੇ ਜ਼ਰੀਏ ਦੋਹਾਂ ਦੇਸ਼ਾਂ ਦੇ ਲੋਕਾਂ ਨੂੰ ਵੀ ਮਿਲਣ ਦਾ ਮੌਕਾ ਮਿਲਿਆ ਹੈ। 65 ਸਾਲ ਪਹਿਲਾਂ ਦੋਹਾਂ ਦੇਸ਼ਾਂ ਵਿਚਾਲੇ ਹੋਏ ਇਸ ਯੁੱਧ ਤੋਂ ਬਾਅਦ ਵਿਛੜੇ ਪਰਿਵਾਰਾਂ ਨੂੰ ਇਕ ਸੰਯੁਕਤ ਆਯੋਜਨ ‘ਚ ਮਿਲਣ ਦਾ ਮੌਕਾ ਮਿਲਿਆ। ਇਸ ਆਯੋਜਨ ਨੂੰ ‘ਇੰਟਰ ਕੋਰੀਅਮ ਫੈਮਿਲੀ ਰੀਯੂਨੀਅਨ’ ਦਾ ਨਾਂ ਦਿੱਤਾ ਗਿਆ ਹੈ। ਦੱਖਣੀ ਕੋਰੀਆ ਦੀ ਅਖਬਾਰ ਏਜੰਸੀ ਮੁਤਾਬਕ, ਉਸ ਯੁੱਧ ਤੋਂ ਬਾਅਦ ਪਹਿਲੀ ਵਾਰ 81 ਪਰਿਵਾਰਾਂ ਦੇ ਕਰੀਬ 300 ਲੋਕਾਂ ਨੂੰ ਇਕ-ਦੂਜੇ ਨੂੰ ਮਿਲਣ ਦਾ ਮੌਕਾ ਮਿਲਿਆ। ਚੀਨ ਉੱਤਰੀ ਕੋਰੀਆ ਦਾ ਇਕੋਂ-ਇਕ ਮਹੱਤਵਪੂਰਣ ਸਹਿਯੋਗੀ ਹੈ। ਨਾਲ ਹੀ ਚੀਨ ਇਸ ਖੇਤਰ ‘ਚ ਅਮਰੀਕਾ ਦਾ ਸਭ ਤੋਂ ਸ਼ਕਤੀਸ਼ਾਲੀ ਰਣਨੀਤਕ ਮੁਕਾਬਲੇਬਾਜ਼ ਵੀ ਹੈ। ਫਿਲਹਾਲ ਅਮਰੀਕਾ ਅਤੇ ਚੀਨ ‘ਚ ਆਪਸੀ ਵਪਾਰ ਨੂੰ ਲੈ ਕੇ ਵਿਵਾਦ ਚੱਲ ਰਿਹਾ ਹੈ। ਅਮਰੀਕਾ ਦੇ ਰਾਸ਼ਟਰਪਤੀ ਦੀ ਸ਼ਿਕਾਇਤ ਹੈ ਕਿ ਕਈ ਅਨੁਚਿਤ ਪ੍ਰਥਾਵਾਂ ਕਾਰਨ ਅਮਰੀਕਾ ਨੂੰ ਖਾਸਾ ਨੁਕਸਾਨ ਹੋਇਆ ਹੈ। ਇਸ ਲਈ ਅਮਰੀਕਾ ਨੇ ਚੀਨੀ ਸਮਾਨ ‘ਤੇ 25 ਫੀਸਦੀ ਸੀਮਾ-ਸ਼ੁਲਕ ਲਾਉਣ ਦਾ ਐਲਾਨ ਕੀਤਾ ਸੀ। ਇਸ ਦੇ ਜਵਾਬ ‘ਚ ਚੀਨ ਨੇ ਲੀ ਅਮਰੀਕੀ ਸਮਾਨ ‘ਤੇ ਉਨਾਂ ਹੀ ਟੈਕਸ ਲਾ ਦਿੱਤਾ ਸੀ। ਦੋਹਾਂ ਦੇਸ਼ਾਂ ਦੀ ਤੁਲਨਾ ਕਰੀਏ ਤਾਂ ਅਮਰੀਕਾ ਚੀਨ ਤੋਂ ਕਰੀਬ 4 ਗੁਣਾ ਜ਼ਿਆਦਾ ਸਮਾਨ ਦੀ ਦਰਾਮਦ ਕਰਦਾ ਹੈ।