ਕੋਹਲੀ ਤੇ ਬੁਮਰਾਹ ਨੇ ਸਰਵੋਤਮ ਦਰਜਾਬੰਦੀ ਬਰਕਰਾਰ ਰੱਖੀ

ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਅਤੇ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਅੱਜ ਜਾਰੀ ਤਾਜ਼ਾ ਆਈਸੀਸੀ ਦੀ ਬੱਲੇਬਾਜ਼ੀ ਅਤੇ ਗੇਂਦਬਾਜ਼ੀ ਦਰਜਾਬੰਦੀ ਵਿੱਚ ਚੋਟੀ ’ਤੇ ਬਰਕਰਾਰ ਹਨ। ਭਾਰਤੀ ਟੀਮ ਆਈਸੀਸੀ ਵਿਸ਼ਵ ਕੱਪ ਦੇ ਸੈਮੀ-ਫਾਈਨਲ ਵਿੱਚ ਨਿਊਜ਼ੀਲੈਂਡ ਤੋਂ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਈ ਸੀ।ਐਤਵਾਰ ਨੂੰ ਲਾਰਡਜ਼ ਦੇ ਮੈਦਾਨ ’ਤੇ ਖੇਡੇ ਗਏ ਰੋਮਾਂਚਕ ਫਾਈਨਲ ਮਗਰੋਂ ਚੈਂਪੀਅਨ ਇੰਗਲੈਂਡ ਅਤੇ ਉਪ ਜੇਤੂ ਨਿਊਜ਼ੀਲੈਂਡ ਦੇ ਖਿਡਾਰੀਆਂ ਨੂੰ ਤਾਜ਼ਾ ਰੈਂਕਿੰਗਜ਼ ਵਿੱਚ ਫ਼ਾਇਦਾ ਮਿਲਿਆ। ਇਸ ਰੈਂਕਿੰਗਜ਼ ਵਿੱਚ ਸੈਮੀ-ਫਾਈਨਲ ਅਤੇ ਫਾਈਨਲ ਦੇ ਪ੍ਰਦਰਸ਼ਨ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਬੱਲੇਬਾਜ਼ਾਂ ਦੀ ਰੈਂਕਿੰਗ ਵਿੱਚ ਪਹਿਲੇ ਸਥਾਨਾਂ ’ਤੇ ਕੋਹਲੀ ਅਤੇ ਰੋਹਿਤ ਸ਼ਰਮਾ ਹਨ। ਜਦਕਿ ਗੇਂਦਬਾਜ਼ਾਂ ਵਿੱਚ ਪਹਿਲੇ ਦਸ ਵਿੱਚ ਬੁਮਰਾਹ ਹੀ ਇਕਲੌਤਾ ਭਾਰਤੀ ਹੈ।ਵਿਸ਼ਵ ਕੱਪ ਵਿੱਚ ‘ਮੈਨ ਆਫ ਦਿ ਟੂਰਨਾਮੈਂਟ’ ਰਹੇ ਕੇਨ ਵਿਲੀਅਮਸਨ ਨੇ ਸੈਮੀ-ਫਾਈਨਲ ਮਗਰੋਂ ਕਰੀਅਰ ਦੇ ਸਭ ਤੋਂ ਵੱਧ 799 ਰੈਂਕਿੰਗ ਅੰਕ ਹਾਸਲ ਕੀਤੇ, ਪਰ ਫਾਈਨਲ ਮਗਰੋਂ ਉਸ ਦੇ ਨਾਂਅ 796 ਅੰਕ ਰਹੇ ਅਤੇ ਉਹ ਹਮਵਤਨ ਰੋਸ ਟੇਲਰ ਮਗਰੋਂ ਛੇਵੇਂ ਸਥਾਨ ’ਤੇ ਹੈ। ਇੰਗਲੈਂਡ ਦੇ ਹਰਫ਼ਨਮੌਲਾ ਬੈੱਨ ਸਟੌਕਸ ਕਰੀਅਰ ਦੇ ਸਰਵੋਤਮ 694 ਅੰਕ ਨਾਲ ਬੱਲੇਬਾਜ਼ਾਂ ਦੀ ਸੂਚੀ ਵਿੱਚ 20ਵੇਂ ਸਥਾਨ ’ਤੇ ਪਹੁੰਚ ਗਿਆ। ਟੀਮ ਦੇ ਸਲਾਮੀ ਬੱਲੇਬਾਜ਼ ਜੇਸਨ ਰਾਏ ਸੈਮੀ-ਫਾਈਨਲ ਵਿੱਚ ਆਸਟਰੇਲੀਆ ਖ਼ਿਲਾਫ਼ 65 ਗੇਂਦਾਂ ਵਿੱਚ 85 ਦੌੜਾਂ ਦੇ ਬਲਬੂਤੇ ਪਹਿਲੀ ਵਾਰ ਚੋਟੀ ਦੇ ਦਸ ਵਿੱਚ ਥਾਂ ਬਣਾਉਣ ਵਿੱਚ ਸਫਲ ਰਿਹਾ। ਬੱਲੇਬਾਜ਼ਾਂ ਦੀ ਰੈਂਕਿੰਗ ਵਿੱਚ ਰਵਿੰਦਰ ਜਡੇਜਾ ਨੇ 24 ਸਥਾਨਾਂ ਦਾ ਸੁਧਾਰ ਕੀਤਾ ਹੈ। ਨਿਊਜ਼ੀਲੈਂਡ ਖ਼ਿਲਾਫ਼ ਸੈਮੀ-ਫਾਈਨਲ ਵਿੱਚ 77 ਦੌੜਾਂ ਦੀ ਪਾਰੀ ਉਹ 108ਵੇਂ ਸਥਾਨ ’ਤੇ ਆ ਗਿਆ ਹੈ।ਗੇਂਦਬਾਜ਼ਾਂ ਦੀ ਰੈਂਕਿੰਗਜ਼ ਵਿੱਚ ਇੰਗਲੈਂਡ ਦਾ ਕ੍ਰਿਸ ਵੋਕਸ ਕਰੀਅਰ ਦੇ ਸਰਵੋਤਮ 676 ਰੇਟਿੰਗ ਅੰਕ ਨਾਲ ਸੱਤਵੇਂ ਸਥਾਨ ’ਤੇ ਆ ਗਿਆ ਹੈ। ਉਸ ਦੀ ਸਰਵੋਤਮ ਰੈਂਕਿੰਗ ਛੇ ਹੈ। ਟੂਰਨਾਮੈਂਟ ਵਿੱਚ 20 ਵਿਕਟਾਂ ਲੈਣ ਵਾਲੇ ਜੌਫਰਾ ਆਰਚਰ ਪਹਿਲੀ ਵਾਰ ਚੋਟੀ ਦੇ 30 ਵਿੱਚ ਪਹੁੰਚ ਗਿਆ ਹੈ।