ਜੂਨੀਅਰ ਹਾਕੀ ਟੀਮ ਇਤਿਹਾਸ ਸਿਰਜਣ ਦੇ ਸਮਰੱਥ: ਹਰਿੰਦਰ

ਭੁਬਨੇਸ਼ਵਰ – ਭਾਰਤ ਦੇ ਮੁੱਖ ਕੋਚ ਹਰਿੰਦਰ ਸਿੰਘ ਨੇ ਅੱਜ ਐਫਆਈਐਚ ਵਿਸ਼ਵ ਕੱਪ ਵਿੱਚ ਕਈ ਜੂਨੀਅਰ ਖਿਡਾਰੀਆਂ ਦੀ ਮੌਜੂਦਗੀ ਦਾ ਬਚਾਅ ਕਰਦਿਆਂ ਕਿਹਾ ਕਿ ਉਹ ਇਤਿਹਾਸ ਸਿਰਜਣ ਦੇ ਸਮਰੱਥ ਹਨ। ਭਾਰਤ ਦੀ ਮੌਜੂਦਾ ਟੀਮ ਵਿੱਚ 18 ਵਿੱਚੋਂ ਸੱਤ ਖਿਡਾਰੀ ਜੂਨੀਅਰ ਵਿਸ਼ਵ ਕੱਪ ਟੀਮ ਤੋਂ ਲਏ ਗਏ ਹਨ, ਜਿਸ ਨੇ ਹਰਿੰਦਰ ਦੀ ਅਗਵਾਈ ਵਿੱਚ ਦੋ ਸਾਲ ਪਹਿਲਾਂ ਲਖਨਊ ਵਿੱਚ ਖ਼ਿਤਾਬ ਜਿੱਤਿਆ ਸੀ। ਹਰਮਨਪ੍ਰੀਤ ਸਿੰਘ, ਵਰੁਣ ਕੁਮਾਰ, ਸੁਮਿਤ, ਮਨਦੀਪ ਸਿੰਘ ਅਤੇ ਗੋਲਕੀਪਰ ਕ੍ਰਿਸ਼ਨ ਪਾਠਕ ਨੂੰ ਭਾਰਤੀ ਟੀਮ ਵਿੱਚ ਚੁਣਿਆ ਗਿਆ ਹੈ। ਦੱਖਣੀ ਅਫਰੀਕਾ ਖ਼ਿਲਾਫ਼ ਮੈਚ ਤੋਂ ਪਹਿਲਾਂ ਹਰਿੰਦਰ ਨੇ ਕਿਹਾ, ‘‘ਸੰਵਿਧਾਨ ਸਾਨੂੰ 18 ਸਾਲ ਮਗਰੋਂ ਵਿਆਹ ਦਾ ਹੱਕ ਦਿੰਦਾ ਹੈ। ਇਸ ਲਈ ਇਹ ਅਜਿਹੀ ਟੀਮ ਹੈ, ਜੋ ਇਤਿਹਾਸ ਸਿਰਜ ਸਕਦੀ ਹੈ।’’ ਭਾਰਤੀ ਹਾਕੀ ਟੀਮ ਦੇ ਕਪਤਾਨ ਮਨਪ੍ਰੀਤ ਨੇ ਕਿਹਾ ਕਿ ਪਿਛਲੇ ਤਿੰਨ-ਚਾਰ ਸਾਲਾਂ ਵਿੱਚ ਭਾਰਤੀ ਟੀਮ ਨੇ ਕਾਫੀ ਸੁਧਾਰ ਕੀਤਾ ਹੈ। ਇਸ ਲਈ ਸੋਨ ਤਗ਼ਮੇ ਦੀ ਉਮੀਦ ਹੈ।