ਦਹਿਸ਼ਤਗਰਦੀ ਪੀੜਤਾਂ ਦੀ ਮਦਦ ਸਾਡਾ ਨੈਤਿਕ ਫ਼ਰਜ਼: ਗੁਟੇਰੇਜ਼

ਸੰਯੁਕਤ ਰਾਸ਼ਟਰ – ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਅੰਤੋਨੀਓ ਗੁਟੇਰੇਜ਼ ਨੇ ਦਹਿਸ਼ਤਗਰਦੀ ਦੇ ਪੀੜਤਾਂ ਤੇ ਉਨ੍ਹਾਂ ਦੇ ਪਰਿਵਾਰਾਂ ਲਈ ਆਲਮੀ ਪੱਧਰ ’ਤੇ ਸਹਿਯੋਗ ਦੀ ਲੋੜ ’ਤੇ ਜ਼ੋਰ ਦਿੰਦਿਆਂ ਕਿਹਾ ਕਿ ਅਜਿਹੇ ਲੋਕਾਂ ਦੇ ਹੱਕਾਂ ਦੀ ਰਾਖੀ ਕਰਨਾ ਸਾਡਾ ‘ਇਖ਼ਲਾਕੀ ਫ਼ਰਜ਼’ ਹੈ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਲੋਕਾਂ ਦੇ ਹੱਕ ਵਿੱਚ ਆਵਾਜ਼ ਬੁਲੰਦ ਕਰ ਕੇ ਦਹਿਸ਼ਤਪਸੰਦਾਂ ਵੱਲੋਂ ਫੈਲਾਈ ਜਾਣ ਵਾਲੀ ਨਫ਼ਰਤ ਦਾ ਟਾਕਰਾ ਕਰਨ ਵਿੱਚ ਮਦਦ ਮਿਲੇਗੀ। ਸ੍ਰੀ ਗੁਟੇਰੇਜ਼ ਇਥੇ 21 ਅਗਸਤ ਨੂੰ ਦਹਿਸ਼ਤਗਰਦੀ ਦੇ ਪੀੜਤਾਂ ਨੂੰ ਸਮਰਪਿਤ ਪਹਿਲੇ ਕੌਮਾਂਤਰੀ ਯਾਦਗਾਰੀ ਤੇ ਸ਼ਰਧਾਂਜਲੀ ਦਿਹਾੜੇ ਵਜੋਂ ਮਨਾਏ ਜਾਣ ਸਮੇਂ ਬੋਲ ਰਹੇ ਸਨ। ਇਹ ਦਿਵਸ ਮਨਾਉਣ ਦੀ ਸ਼ੁਰੂਆਤ ਦੁਨੀਆ ਭਰ ਵਿੱਚ ਆਮ ਲੋਕਾਂ ਉਤੇ ਦਹਿਸ਼ਤਗਰਦੀ ਦੇ ਪੈਣ ਵਾਲੇ ਅਸਰ ਨੂੰ ਤਸਲੀਮ ਕਰਨ ਲਈ ਕੀਤੀ ਗਈ ਹੈ। ਬੀਤੇ ਦਸੰਬਰ ਵਿੱਚ ਯੂਐਨ ਜਨਰਲ ਅਸੈਂਬਲੀ ਨੇ ਇਕ ਮਤਾ ਪਾਸ ਕਰ ਕੇ 21 ਅਗਸਤ ਨੂੰ ਦਹਿਸ਼ਤਗਰਦੀ ਦੇ ਪੀੜਤਾਂ ਦੀ ਸਹਾਇਤਾ ਤੇ ਸਤਿਕਾਰ ਲਈ ਸਾਲਾਨਾ ਦਿਹਾੜੇ ਵਜੋਂ ਮਨਾਉਣ ਦਾ ਫ਼ੈਸਲਾ ਕੀਤਾ ਸੀ।