ਧੋਨੀ ਇਕ ਰੋਜ਼ਾ ਟੀਮ ਦਾ ਅਹਿਮ ਹਿੱਸਾ: ਕੋਹਲੀ

ਤਿਰੂਵਨੰਤਪੁਰਮ – ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਨੇ ਅੱਜ ਦੁਹਰਾਇਆ ਕਿ ਮਹਿੰਦਰ ਸਿੰਘ ਧੋਨੀ ਇਕ ਰੋਜ਼ਾ ਟੀਮ ਦਾ ਅਹਿਮ ਹਿੱਸਾ ਬਣੇ ਰਹਿਣਗੇ। ਕਪਤਾਨ ਨੇ ਕਿਹਾ ਕਿ ਇਸ ਤਜਰਬੇਕਾਰ ਵਿਕਟਕੀਪਰ ਨੇ ਰਿਸ਼ਭ ਪੰਤ ਲਈ ਥਾਂ ਬਣਾਉਣ ਦੇ ਮੱਦੇਨਜ਼ਰ ਅਗਾਮੀ ਟੀ-20 ਲੜੀ ਵਿੱਚ ਨਾ ਖੇਡਣ ਦਾ ਫ਼ੈਸਲਾ ਕੀਤਾ ਹੈ। ਇਸ ਦੌਰਾਨ ਕੋਹਲੀ ਅਤੇ ਟੀਮ ਦੇ ਮੁੱਖ ਕੋਚ ਰਵੀ ਸ਼ਾਸਤਰੀ ਨੇ ਕਿਹਾ ਕਿ ਵੈਸਟ ਇੰਡੀਜ਼ ਖ਼ਿਲਾਫ਼ ਖਤਮ ਹੋਈ ਇਕ ਰੋਜ਼ਾ ਲੜੀ ’ਚ ਅੰਬਾਤੀ ਰਾਇਡੂ ਦਾ ਚੌਥੇ ਨੰਬਰ ’ਤੇ ਸ਼ਾਨਦਾਰ ਬੱਲੇਬਾਜ਼ੀ ਕਰਨਾ ਅਤੇ ਨੌਜਵਾਨ ਖ਼ਲੀਲ ਅਹਿਮਦ ਦਾ ਤੀਜੇ ਗੇਂਦਬਾਜ਼ ਵਜੋਂ ਸਾਹਮਣੇ ਆਉਣਾ ਇਸ ਲੜੀ ਦੇ ਸਕਾਰਾਤਮਕ ਹਾਸਲ ਹਨ।