ਨਿਸ਼ਾਨੇਬਾਜ਼ੀ: ਅੰਜੁਮ ਅਤੇ ਅਪੂਰਵੀ ਨੂੰ ਮਿਲਿਆ ਓਲੰਪਿਕ ਕੋਟਾ

ਚਾਂਗਵੋਨ – ਅੰਜੁਮ ਮੋਦਗਿਲ ਅਤੇ ਅਪੂਰਵੀ ਚੰਦੇਲਾ ਸੋਮਵਾਰ ਨੂੰ ਇੱਥੇ ਆਈਐੱਸਐੱਸਐੱਫ ਵਿਸ਼ਵ ਚੈਂਪੀਅਨਸ਼ਿਪ ਦੇ ਮਹਿਲਾ 10 ਮੀਟਰ ਏਅਰ ਰਾਈਫ਼ਲ ਮੁਕਾਬਲੇ ਵਿੱਚ ਓਲੰਪਿਕ ਕੋਟਾ ਹਾਸਲ ਕਰ ਲਿਆ ਹੈ। ਅੰਜੁਮ ਨੇ ਇਸ ਮੁਕਾਬਲੇ ਵਿੱਚ ਚਾਂਦੀ ਦਾ ਤਗ਼ਮਾ ਹਾਸਲ ਕੀਤਾ ਹੈ ਤੇ ਜਦਕਿ ਚੰਦੇਲਾ ਚੌਥੇ ਸਥਾਨ ’ਤੇ ਰਹੀ ਹੈ। ਉਹ ਦੋਵੇਂ 2020 ਵਿੱਚ ਹੋਣ ਵਾਲੀਆਂ ਓਲੰਪਿਕ ਖੇਡਾਂ ਲਈ ਕੋਟਾ ਹਾਸਲ ਕਰਨ ਵਾਲੀਆਂ ਸ਼ੁਰੂਆਤੀ ਭਾਰਤੀ ਨਿਸ਼ਾਨੇਬਾਜ਼ ਬਣ ਗਈਆਂ ਹਨ। ਅੰਜੁਮ ਕੋਰੀਆ ਦੀ ਹਾਨਾ ਇਮ (251.1) ਤੋਂ ਪਿੱਛੇ ਦੂਜੇ ਸਥਾਨ ’ਤੇ ਰਹੀ। ਕੋਰੀਆ ਦੀ ਹੀ ਯੁਨਹਿਯਾ ਜੁੰਗ (228.0) ਨੇ ਕਾਂਸੀ ਦਾ ਤਗ਼ਮਾ ਹਾਸਲ ਕੀਤਾ ਹੈ। ਅੰਜੁਮ (24) ਨੇ ਅੱਠ ਨਿਸ਼ਾਨੇਬਾਜ਼ਾਂ ਦੇ ਫਾਈਨਲ ਵਿੱਚ 248.4 ਅੰਕਾਂ ਨਾਲ ਚਾਂਦੀ ਦਾ ਤਗ਼ਮਾ ਜਿੱਤਿਆ ਹੈ। ਉਸ ਨੇ ਇਸ ਵੱਕਾਰੀ ਟੂਰਨਾਮੈਂਟ ਵਿੱਚ ਭਾਰਤ ਦੀ ਸੀਨੀਅਰ ਟੀਮ ਦਾ ਖਾਤਾ ਖੋਲ੍ਹਿਆ। ਅਪੂਰਵੀ 207 ਅੰਕ ਹਾਸਲ ਕਰਕੇ ਚੌਥੇ ਸਥਾਨ ’ਤੇ ਰਹੀ ਪਰ ਕੋਟਾ ਹਾਸਲ ਕਰਨ ਵਿੱਚ ਸਫ਼ਲ ਰਹੀ ਕਿਉਂਕਿ ਇਕ ਦੇਸ਼ ਇਸ ਮੁਕਾਬਲੇ ਵਿੱਚੋਂ ਦੋ ਓਲੰਪਿਕ ਕੋਟਾ ਹਾਸਲ ਕਰ ਸਕਦਾ ਹੈ। ਆਈਐੱਸਐੱਸਐੱਫ ਦਾ ਇਹ ਸਿਖ਼ਰਲਾ ਟੂਰਨਾਮੈਂਟ ਬੇਹੱਦ ਮਹੱਤਵਪੂਰਨ ਹੈ ਕਿਉਂਕਿ ਟੋਕੀਓ ਖੇਡਾਂ ਦਾ ਇਹ ਪਹਿਲਾ ਕੋਟਾ ਮੁਕਾਬਲਾ ਹੈ ਤੇ 15 ਵੱਖ-ਵੱਖ ਵਰਗਾਂ ਵਿੱਚ 60 ਥਾਵਾਂ ਦਾਅ ’ਤੇ ਲੱਗੀਆਂ ਹੋਈਆਂ ਹਨ। ਇਸ ਤੋਂ ਪਹਿਲਾਂ ਕੁਆਲੀਫ਼ਿਕੇਸ਼ਨ ਵਿੱਚ ਅੰਜੁਮ ਤੇ ਅਪੂਰਵੀ ਚੌਥੇ ਤੇ ਛੇਵੇਂ ਸਥਾਨ ’ਤੇ ਰਹੇ ਸਨ।