ਬੰਗਲਾਦੇਸ਼ ਦੀ ਅਫ਼ਗ਼ਾਨਿਸਤਾਨ ਨਾਲ ਟੱਕਰ ਅੱਜ

ਸਾਊਥੈਂਪਟਨ – ਸੈਮੀ-ਫਾਈਨਲ ’ਚ ਪਹੁੰਚਣ ’ਤੇ ਨਜ਼ਰਾਂ ਲਾਈ ਬੈਠੇ ਬੰਗਲਾਦੇਸ਼ ਨੂੰ ਸੋਮਵਾਰ ਨੂੰ ਇੱਥੇ ਹੋਣ ਵਾਲੇ ਵਿਸ਼ਵ ਕੱਪ ਦੇ ਕਰੋ ਜਾਂ ਮਰੋ ਦੇ ਮੁਕਾਬਲੇ ਵਿੱਚ ਅਫ਼ਗਾਨਿਸਤਾਨ ਦੀ ਚੁਣੌਤੀ ਨਾਲ ਨਜਿੱਠਣਾ ਹੋਵੇਗਾ। ਬੀਤੇ ਦਿਨੀਂ ਸ੍ਰੀਲੰਕਾ ਹੱਥੋਂ ਇੰਗਲੈਂਡ ਦੀ ਹਾਰ ਨੇ ਬੰਗਲਾਦੇਸ਼ ਦੀ ਸੈਮੀ-ਫਾਈਨਲ ਵਿੱਚ ਥਾਂ ਹਾਸਲ ਕਰਨ ਦੀ ਉਮੀਦ ਤੋੜ ਦਿੱਤੀ ਸੀ। ਹੁਣ ਉਹ ਹੇਠਲੇ ਸਥਾਨ ’ਤੇ ਕਾਬਜ਼ ਅਫ਼ਗਾਨਿਸਤਾਨ ਖ਼ਿਲਾਫ਼ ਜਿੱਤ ਨਾਲ ਮੌਕੇ ਦਾ ਫ਼ਾਇਦਾ ਉਠਾਉਣਾ ਚਾਹੇਗੀ। ਮਸ਼ਰਫ਼ੀ ਮੋਰਤਜ਼ਾ ਦੀ ਅਗਵਾਈ ਵਾਲੀ ਟੀਮ ਇਸ ਵੇਲੇ ਪੰਜ ਅੰਕਾਂ ਨਾਲ ਛੇਵੇਂ ਸਥਾਨ ’ਤੇ ਕਾਬਜ਼ ਹੈ। ਹਾਲਾਂਕਿ ਉਸ ਨੇ ਟੂਰਨਾਮੈਂਟ ਵਿੱਚ ਹੁਣ ਤੱਕ ਬਹੁਤ ਵਧੀਆ ਬੱਲੇਬਾਜ਼ੀ ਕੀਤੀ ਹੈ। ਵੈਸਟ ਇੰਡੀਜ਼ ਖ਼ਿਲਾਫ਼ 322 ਦੌੜਾਂ ਦੇ ਟੀਚੇ ਨੂੰ ਬੰਗਲਾਦੇਸ਼ ਨੇ ਸਿਰਫ਼ 41.3 ਓਵਰਾਂ ਵਿੱਚ ਹਾਸਲ ਕਰ ਲਿਆ ਅਤੇ ਆਸਟਰੇਲੀਆ ਖ਼ਿਲਾਫ਼ ਮੈਚ ਵਿੱਚ ਉਸ ਨੇ 382 ਦੌੜਾਂ ਦਾ ਪਿੱਛਾ ਕਰਦਿਆਂ ਅੱਠ ਵਿਕਟਾਂ ’ਤੇ 333 ਦੌੜਾਂ ਬਣਾਈਆਂ। ਸ਼ਾਕਿਬ-ਅਲ-ਹਸਨ ਦੀ ਬੱਲੇਬਾਜ਼ੀ ਕ੍ਰਮ ਵਿੱਚ ਉਪਰ ਭੇਜਣਾ ਵਿਸ਼ਵ ਕੱਪ ਵਿੱਚ ਅਹਿਮ ਚੀਜ਼ ਰਹੀ ਹੈ। ਇਹ ਹਰਫ਼ਨਮੌਲਾ ਆਸਟਰੇਲੀਆ ਦੇ ਡੇਵਿਡ ਵਾਰਨਰ ਤੋਂ ਸਿਰਫ਼ 22 ਦੌੜਾਂ ਪਿੱਛੇ ਹੈ, ਜੋ ਟੂਰਨਾਮੈਂਟ ਵਿੱਚ ਚੋਟੀ ਦਾ ਸਕੋਰਰ ਹੈ। ਹਾਲਾਂਕਿ ਉਸ ਦੀ ਗੇਂਦਬਾਜ਼ੀ ਕੁੱਝ ਜ਼ਿਆਦਾ ਕਮਾਲ ਨਹੀਂ ਕਰ ਸਕੀ, ਕਿਉਂਕਿ ਬੰਗਲਾਦੇਸ਼ ਨੇ ਆਪਣੇ ਤਿੰਨ ਮੈਚ ਗੁਆਏ ਹਨ। ਗੇਂਦਬਾਜ਼ਾਂ ਨੂੰ ਆਪਣੇ ਪ੍ਰਦਰਸ਼ਨ ਵਿੱਚ ਸੁਧਾਰ ਕਰਕੇ ਆਪਣੇ ਬੱਲੇਬਾਜ਼ਾਂ ’ਤੇ ਥੋੜ੍ਹਾ ਦਬਾਅ ਘੱਟ ਕਰਨਾ ਹੋਵੇਗਾ। ਦੂਜੇ ਪਾਸੇ ਅਫ਼ਗਾਨਿਸਤਾਨ ਨੂੰ ਟੂਰਨਾਮੈਂਟ ਵਿੱਚ ਹੁਣ ਵੀ ਆਪਣੀ ਪਹਿਲੀ ਜਿੱਤ ਦੀ ਉਡੀਕ ਹੈ ਅਤੇ ਭਾਰਤ ਖ਼ਿਲਾਫ਼ ਉਸ ਦਾ ਰੋਮਾਂਚਕ ਮੈਚ ਟੀਮ ਨੂੰ ਪ੍ਰੇਰਿਤ ਕਰੇਗਾ।