ਭਾਰਤੀ ਵੇਟਲਿਫਟਰਾਂ ਦਾ ਮਾਯੂਸਕੁਨ ਪ੍ਰਦਰਸ਼ਨ ਜਾਰੀ

ਜਕਾਰਤਾ – ਭਾਰਤੀ ਖਿਡਾਰੀ ਵਿਕਾਸ ਠਾਕੁਰ ਨੇ ਏਸ਼ਿਆਈ ਖੇਡਾਂ ਦੇ ਵੇਟਲਿਫਟਿੰਗ ਮੁਕਾਬਲੇ ਵਿੱਚ ਅੱਜ ਪੁਰਸ਼ਾਂ ਦੇ 94 ਕਿਲੋ ਵਜ਼ਨ ਵਰਗ ਵਿੱਚ ਨਮੋਸ਼ੀਜਨਕ ਪ੍ਰਦਰਸ਼ਨ ਕੀਤਾ ਅਤੇ ਨੌਂ ਖਿਡਾਰੀਆਂ ਵਿੱਚੋਂ ਉਹ ਅੱਠਵੇਂ ਸਥਾਨ ’ਤੇ ਰਿਹਾ। ਇਸ ਮੁਕਾਬਲੇ ਵਿੱਚ ਓਲੰਪਿਕ ਚੈਂਪੀਅਨ ਇਰਾਨੀ ਖਿਡਾਰੀ ਸੋਹਰਾਬ ਮੋਰਾਦੀ ਨੇ ਸਟੈਚ ਵਿੱਚ ਵਿਸ਼ਵ ਰਿਕਾਰਡ ਤੋੜਦਿਆਂ ਸੋਨ ਤਗ਼ਮਾ ਜਿੱਤਿਆ। ਉਸ ਨੇ ਕੁੱਲ 410 ਕਿਲੋਗ੍ਰਾਮ ਵਜ਼ਨ ਚੁੱਕਿਆ। ਮੋਰਾਦੀ ਨੇ ਸਨੈਚ ਵਿੱਚ 189 ਕਿਲੋ ਅਤੇ ਕਲੀਨ ਐਂਡ ਜਰਕ ਵਿੱਚ 221 ਕਿਲੋਗ੍ਰਾਮ ਵਜ਼ਨ ਚੁੱਕਿਆ। 24 ਸਾਲਾ ਭਾਰਤੀ ਵੇਟਲਿਫਟਰ ਵਿਕਾਸ ਕੁੱਲ 335 ਕਿਲੋ ਵਜ਼ਨ ਚੁੱਕ ਸਕਿਆ। ਉਸ ਨੇ ਸਨੈਚ ਵਿੱਚ 145 ਕਿਲੋਗ੍ਰਾਮ ਵਜ਼ਨ ਚੁੱਕਿਆ, ਜਿਸ ਵਿੱਚ ਉਸ ਦੇ ਪਹਿਲੇ ਦੋ ਯਤਨ ਅਸਫਲ ਰਹੇ, ਜਦਕਿ ਕਲੀਨ ਐਂਡ ਜਰਕ ਵਿੱਚ ਉਹ 190 ਕਿਲੋ ਵਜ਼ਨ ਹੀ ਉਠਾ ਸਕਿਆ।