ਮਹਿਲਾ ਵਿਸ਼ਵ ਹਾਕੀ ਕੱਪ: ਭਾਰਤ ਦੀ ਇੰਗਲੈਂਡ ਨਾਲ ਟੱਕਰ ਅੱਜ

ਲੰਡਨ – ਅਨੁਭਵੀ ਫਾਰਵਰਡ ਰਾਣੀ ਦੀ ਅਗਵਾਈ ਵਿੱਚ ਭਾਰਤ ਮਹਿਲਾ ਹਾਕੀ ਵਿਸ਼ਵ ਕੱਪ ਵਿੱਚ ਸ਼ਨਿਚਰਵਾਰ ਨੂੰ ਹੋਣ ਵਾਲੇ ਪਹਿਲੇ ਮੁਕਾਬਲੇ ਵਿੱਚ ਮੇਜ਼ਬਾਨ ਅਤੇ ਓਲੰਪਿਕ ਚੈਂਪੀਅਨ ਇੰਗਲੈਂਡ ਨਾਲ ਭਿੜੇਗਾ। ਇਸ ਆਲਮੀ ਟੂਰਨਾਮੈਂਟ ਦੇ 44 ਸਾਲ ਦੇ ਇਤਿਹਾਸ ਵਿੱਚ ਭਾਰਤ ਦਾ ਯਤਨ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕਰਨ ਦਾ ਹੋਵੇਗਾ। ਟੂਰਨਾਮੈਂਟ ਦੌਰਾਨ ਭਾਰਤ ਦੁਨੀਆ ਦੀ ਦੂਜੇ ਨੰਬਰ ਦੀ ਟੀਮ ਇੰਗਲੈਂਡ, ਸਤਵੇਂ ਨੰਬਰ ਦੀ ਅਮਰੀਕਾ ਅਤੇ 16ਵੀਂ ਰੈਂਕਿੰਗ ਦੀ ਆਇਰਲੈਂਡ ਨਾਲ ਗਰੁੱਪ ‘ਬੀ’ ਵਿੱਚ ਹੈ। ਭਾਰਤ ਵਿਸ਼ਵ ਦਰਜਾਬੰਦੀ ਵਿੱਚ ਦਸਵੇਂ ਸਥਾਨ ’ਤੇ ਹੈ। ਭਾਰਤ ਦਾ ਪਹਿਲਾ ਮੁਕਾਬਲਾ ਹੀ ਓਲੰਪਿਕ ਚੈਂਪੀਅਨ ਇੰਗਲੈਂਡ ਨਾਲ ਹੈ। ਇੰਗਲੈਂਡ ਨੇ ਭਾਰਤ ਨੂੰ ਗੋਲਡਕੋਸਟ ਰਾਸ਼ਟਰਮੰਡਲ ਖੇਡਾਂ ਦੇ ਕਾਂਸੀ ਦੇ ਤਗ਼ਮੇ ਦੇ ਮੁਕਾਬਲੇ ਵਿੱਚ ਹਰਾਇਆ ਸੀ। ਪਿਛਲੇ ਅੱਠ ਸਾਲਾਂ ਦੌਰਾਨ ਇਹ ਪਹਿਲਾ ਮੌਕਾ ਹੈ, ਜਦੋਂ ਭਾਰਤੀ ਟੀਮ ਵਿਸ਼ਵ ਕੱਪ ਵਿੱਚ ਹਿੱਸਾ ਲੈ ਰਹੀ ਹੈ। ਭਾਰਤੀ ਟੀਮ ਵਿਸ਼ਵ ਕੱਪ ਵਿੱਚ ਸਤਵੀਂ ਵਾਰ ਖੇਡਣ ਉਤਰ ਰਹੀ ਹੈ। ਉਸ ਦਾ ਸਰਵੋਤਮ ਪ੍ਰਦਰਸ਼ਨ 1974 ਦੇ ਵਿਸ਼ਵ ਕੱਪ ਦੌਰਾਨ ਚੌਥਾ ਸਥਾਨ ਰਿਹਾ ਹੈ। ਭਾਰਤ ਨੇ ਹੁਣ ਤੱਕ ਛੇ ਵਾਰ ਵਿਸ਼ਵ ਕੱਪ ਵਿੱਚ ਹਿੱਸਾ ਲਿਆ ਹੈ, ਜਿਸ ਵਿੱਚ ਉਸ ਨੇ ਨੌਂ ਮੈਚ ਜਿੱਤੇ, 27 ਹਾਰੇ ਅਤੇ ਤਿੰਨ ਡਰਾਅ ਖੇਡੇ ਹਨ। ਭਾਰਤ ਨੇ ਇਨ੍ਹਾਂ ਮੈਚਾਂ ਦੌਰਾਨ 48 ਗੋਲ ਕੀਤੇ ਅਤੇ 87 ਗੋਲ ਪਵਾਏ ਹਨ। ਭਾਰਤੀ ਟੀਮ ਵਿੱਚ ਸਿਰਫ਼ ਰਾਣੀ ਅਤੇ ਦੀਪਿਕਾ ਨੂੰ ਹੀ ਵਿਸ਼ਵ ਕੱਪ ਖੇਡਣ ਦਾ ਤਜਰਬਾ ਹੈ, ਜਦਕਿ ਬਾਕੀ ਖਿਡਾਰਨਾਂ ਪਹਿਲੀ ਵਾਰ ਵਿਸ਼ਵ ਕੱਪ ਖੇਡਣਗੀਆਂ। ਹਾਲਾਂਕਿ ਟੀਮ ਵਿੱਚ ਕਈ ਖਿਡਾਰਨਾਂ ਨੂੰ 100 ਤੋਂ ਵੱਧ ਕੌਮਾਂਤਰੀ ਮੈਚ ਖੇਡਣ ਦਾ ਅਨੁਭਵ ਹੈ। ਹਾਲਾਂਕਿ ਦਸਵੇਂ ਨੰਬਰ ਦੀ ਭਾਰਤੀ ਟੀਮ ਤੋਂ ਬਹੁਤ ਜ਼ਿਆਦਾ ਉਮੀਦ ਨਹੀਂ ਕੀਤੀ ਜਾ ਰਹੀ, ਪਰ ਉਸ ਕੋਲ ਇਹ ਟੂਰਨਾਮੈਂਟ ਇੱਕ ਅਜਿਹਾ ਸੁਨਹਿਰਾ ਮੌਕਾ ਹੈ, ਜਿਸ ਕਾਰਨ ਉਹ 18 ਅਗਸਤ ਤੋਂ ਇੰਡੋਨੇਸ਼ੀਆ ਵਿੱਚ ਹੋਣ ਵਾਲੀਆਂ ਏਸ਼ਿਆਈ ਖੇਡਾਂ ਲਈ ਆਪਣੀਆਂ ਤਿਆਰੀਆਂ ਨੂੰ ਮਜ਼ਬੂਤ ਕਰ ਸਕਦੀ ਹੈ। ਏਸ਼ਿਆਈ ਖੇਡਾਂ ਵਿੱਚ ਸੋਨ ਤਗ਼ਮਾ ਭਾਰਤੀ ਟੀਮ ਨੂੰ ਸਿੱਧਾ ਟੋਕੀਓ ਓਲੰਪਿਕ ਦਾ ਦਾਖ਼ਲਾ ਦਿਵਾ ਸਕਦਾ ਹੈ। ਭਾਰਤੀ ਟੀਮ ਜੇਕਰ 1974 ਦੇ ਚੌਥੇ ਸਥਾਨ ਦੇ ਆਪਣੇ ਪ੍ਰਦਰਸ਼ਨ ਵਿੱਚ ਸੁਧਾਰ ਕਰ ਸਕੀ ਤਾਂ ਇਹ ਕਿਸੇ ਚਮਤਕਾਰ ਤੋਂ ਘੱਟ ਨਹੀਂ ਹੋਵੇਗਾ, ਪਰ ਭਾਰਤੀ ਟੀਮ ਆਪਣੇ ਲਈ ਕੁਆਰਟਰ ਫਾਈਨਲ ਨੂੰ ਇੱਕੋ-ਇੱਕ ਟੀਚਾ ਮੰਨ ਕੇ ਚੱਲ ਰਹੀ ਹੈ। ਭਾਰਤੀ ਟੀਮ ਨੂੰ ਰਾਸ਼ਟਰਮੰਡਲ ਖੇਡਾਂ ਦੇ ਸੈਮੀ ਫਾਈਨਲ ਵਿੱਚ ਆਸਟਰੇਲੀਆ ਤੋਂ ਹਾਰ ਝੱਲਣੀ ਪਈ ਸੀ, ਜਦੋਂਕਿ ਕਾਂਸੀ ਦੇ ਤਗ਼ਮੇ ਦੇ ਮੁਕਾਬਲੇ ਵਿੱਚ ਉਸ ਨੂੰ ਇੰਗਲੈਂਡ ਨੇ 6-0 ਗੋਲਾਂ ਨਾਲ ਹਰਾਇਆ ਸੀ। ਭਾਰਤੀ ਟੀਮ 1978 ਦੌਰਾਨ ਸਤਵੇਂ, 1983 ਵਿੱਚ 11ਵੇਂ, 1998 ਦੌਰਾਨ 12ਵੇਂ, 2006 ਵਿੱਚ 11ਵੇਂ ਅਤੇ 2010 ਦੌਰਾਨ ਨੌਵੇਂ ਸਥਾਨ ’ਤੇ ਰਹੀ ਸੀ। ਹਾਲਾਂਕਿ ਇਸ ਮਗਰੋਂ ਭਾਰਤੀ ਟੀਮ ਨੇ ਆਪਣੀ ਖੇਡ ਵਿੱਚ ਸੁਧਾਰ ਕੀਤਾ ਅਤੇ 2013 ਦੌਰਾਨ ਜੂਨੀਅਰ ਮਹਿਲਾ ਵਿਸ਼ਵ ਕੱਪ ਵਿੱਚ ਕਾਂਸੀ ਦਾ ਤਗ਼ਮਾ, 2016 ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ ਵਿੱਚ ਸੋਨ ਤਗ਼ਮਾ ਅਤੇ 2017 ਏਸ਼ੀਆ ਕੱਪ ਵਿੱਚ ਖ਼ਿਤਾਬ ਜਿੱਤਿਆ।