ਯਾਸਿਰ ਸ਼ਾਹ ਨੇ ਤੋੜਿਆ 82 ਸਾਲ ਪੁਰਾਣਾ ਰਿਕਾਰਡ

ਆਬੂ ਧਾਬੀ – ਪਾਕਿਸਤਾਨ ਦੇ ਲੈੱਗ ਸਪਿੰਨਰ ਯਾਸਿਰ ਸ਼ਾਹ ਅੱਜ ਦੁਨੀਆਂ ਦਾ ਸਭ ਤੋਂ ਤੇਜ਼ੀ ਨਾਲ 200 ਟੈਸਟ ਵਿਕਟਾਂ ਹਾਸਲ ਕਰਨ ਵਾਲਾ ਗੇਂਦਬਾਜ਼ ਬਣ ਗਿਆ ਹੈ ਅਤੇ ਉਸ ਨੇ ਨਿਊਜ਼ੀਲੈਂਡ ਖ਼ਿਲਾਫ਼ ਤੀਜੇ ਟੈਸਟ ਮੈਚ ਦੇ ਚੌਥੇ ਦਿਨ 82 ਸਾਲ ਪੁਰਾਣਾ ਰਿਕਾਰਡ ਤੋੜ ਦਿੱਤਾ, ਪਰ ਕੇਨ ਵਿਲੀਅਮਸਨ ਅਤੇ ਹੈਨਰੀ ਨਿਕੋਲਸ ਵਿਚਾਲੇ 212 ਦੌੜਾਂ ਦੀ ਅਟੁੱਟ ਭਾਈਵਾਲੀ ਦੀ ਮਦਦ ਨਾਲ ਨਿਊਜ਼ੀਲੈਂਡ ਨੇ ਤੀਜੇ ਤੇ ਆਖਰੀ ਟੈਸਟ ਮੈਚ ’ਚ ਵੀਰਵਾਰ ਨੂੰ ਇੱਥੇ ਆਪਣੀ ਸਥਿਤੀ ਮਜ਼ਬੂਤ ਕਰ ਲਈ ਹੈ। ਸ਼ਾਹ ਨੇ ਵਿੱਲ ਸਮਰਵਿਲੇ ਨੂੰ ਐੱਲਬੀਡਬਲਿਊ ਆਊਟ ਕਰਕੇ ਮੈਚ ਦੀ ਦੂਜੀ ਵਿਕਟ ਹਾਸਲ ਕੀਤੀ। ਉਸ ਨੇ ਆਸਟਰੇਲੀਆ ਦੇ ਲੈੱਗ ਸਪਿੰਨਰ ਕਲਾਰੀ ਗ੍ਰਿਮੇਟ ਵੱਲੋਂ 1936 ’ਚ ਦੱਖਣੀ ਅਫਰੀਕਾ ਖ਼ਿਲਾਫ਼ ਬਣਾਇਆ ਤੋੜਿਆ ਹੈ। ਗ੍ਰਿਮੇਟ ਨੇ 36 ਟੈਸਟ ਮੈਚਾਂ ’ਚ ਇਹ ਅੰਕੜਾ ਹਾਸਲ ਕੀਤਾ ਸੀ ਜਦਕਿ ਸ਼ਾਹ ਨੇ 33 ਮੈਚਾਂ ’ਚ ਇਹ ਕਾਰਨਾਮਾ ਕਰ ਦਿਖਾਇਆ। ਵਿਲੀਅਮਸਨ ਦੀਆਂ 139 ਤੇ ਨਿਕੋਲਸ ਦੀਆਂ 90 ਦੌੜਾਂ ਦੀ ਮਦਦ ਨਾਲ ਨਿਊਜ਼ੀਲੈਂਡ ਨੇ ਚੌਥੇ ਦਿਨ ਦੀ ਖੇਡ ਮੁੱਕਣ ਤੱਕ ਚਾਰ ਵਿਕਟਾਂ ’ਤੇ 272 ਦੌੜਾਂ ਬਣਾ ਲਈਆਂ ਸਨ।