ਯੂਕੇ ਨੂੰ ਦਹਿਸ਼ਤੀ ਗਰੁੱਪਾਂ ਦੀ ਥਾਂ ਰੂਸ ਤੋਂ ਵਧੇਰੇ ਖ਼ਤਰਾ

ਲੰਡਨ – ਇਸਲਾਮਿਕ ਸਟੇਟ ਅਤੇ ਅਲ ਕਾਇਦਾ ਵਰਗੀਆਂ ਦਹਿਸ਼ਤੀ ਜਥੇਬੰਦੀਆਂ ਦੀ ਥਾਂ ਯੂਕੇ ਨੂੰ ਬਿਨਾਂ ਸ਼ੱਕ ਰੂਸ ਤੋਂ ਵੱਡਾ ਖ਼ਤਰਾ ਦਰਪੇਸ਼ ਹੈ। ਇਹ ਗੱਲ ਸ਼ਨਿਚਰਵਾਰ ਨੂੰ ਛਪੇ ਇਕ ਇੰਟਰਵਿਊ ਵਿੱਚ ਬ੍ਰਿਟਿਸ਼ ਫੌਜ ਮੁਖੀ ਨੇ ਕਹੀ ਹੈ। ਜਨਰਲ ਮਾਰਕ ਕਾਰਲਟਨ ਸਮਿਥ ਨੇ ਚਿਤਾਵਨੀ ਦਿੱਤੀ ਕਿ ਮਾਸਕੋ ਨੇ ਆਪਣੇ ਕੌਮੀ ਹਿੱਤਾਂ ਦੇ ਹੱਕ ਵਿੱਚ ਡਟਣ ਲਈ ਫੌਜ ਦੀ ਵਰਤੋਂ ਦੀ ਇੱਛਾ ਜਤਾਈ ਹੈ। ਉਨ੍ਹਾਂ ਦਿ ਡੇਲੀ ਟੈਲੀਗ੍ਰਾਫ ਨੂੰ ਦੱਸਿਆ ਕਿ ਰੂਸ ਨੇ ਖਾਸਕਰ ਸਾਈਬਰ, ਪੁਲਾੜ ਤੇ ਸਮੁੰਦਰ ਹੇਠਾਂ ਜੰਗ ਵਰਗੇ ਕੁਝ ਗੈਰ ਰਵਾਇਤੀ ਖੇਤਰਾਂ ਵਿੱਚ ਖੋਜ ਲਈ ਤਰਤੀਬਵਾਰ ਕੋਸ਼ਿਸ਼ਾਂ ਅਤੇ ਪੱਛਮੀ ਅਤਿਸੰਵੇਦਨਸ਼ੀਲਤਾ ਦੇ ਸ਼ੋਸਣ ਦੀ ਸ਼ੁਰੂਆਤ ਕੀਤੀ ਹੈ।
ਜ਼ਿਕਰਯੋਗ ਹੈ ਕਿ ਇਸ ਵਰ੍ਹੇ ਰੂਸ ਅਤੇ ਬਰਤਾਨੀਆ ਵਿਚਾਲੇ ਸਬੰਧਾਂ ਵਿੱਚ ਇਤਿਹਾਸਕ ਨਿਘਾਰ ਆਇਆ ਹੈ। ਲੰਡਨ ਨੇ ਰੂਸ ਦੇ ਸਾਬਕਾ ਜਾਸੂਸ ਸਰਗੇਈ ਸਕ੍ਰਿਪਾਲ ਅਤੇ ਉਸ ਦੀ ਧੀ ਯੂਲੀਆ ਨੂੰ ਮਾਰਚ ਵਿੱਚ ਸਲਿਸਬਰੀ ਦੇ ਅੰਗਰੇਜ਼ੀ ਸ਼ਹਿਰ ਵਿੱਚ ਜ਼ਹਿਰ ਦੇਣ ਲਈ ਮੁਲਕ ਦੀ ਫੌਜੀ ਇੰਟੈਲੀਜੈਂਸ ਸੇਵਾ ਨੂੰ ਕਸੂਰਵਾਰ ਠਹਿਰਾਇਆ ਹੈ।