ਵਿੰਡੀਜ਼ ਖ਼ਿਲਾਫ਼ ਸੀਮਤ ਓਵਰਾਂ ਦੀ ਲੜੀ ਲਈ ਟੀਮ ਦਾ ਐਲਾਨ ਅੱਜ

ਹੈਦਰਾਬਾਦ – ਮਹਿੰਦਰ ਸਿੰਘ ਧੋਨੀ ਦੀ ਖਰਾਬ ਬੱਲੇਬਾਜ਼ੀ ਲੈਅ ਕਰ ਕੇ ਚੋਣਕਾਰ ਭਲਕੇ ਇਥੇ ਚੋਣ ਕਮੇਟੀ ਦੀ ਹੋਣ ਵਾਲੀ ਮੀਟਿੰਗ ਦੌਰਾਨ ਵੈਸਟਇੰਡੀਜ਼ ਖ਼ਿਲਾਫ਼ ਇਕ ਰੋਜ਼ਾ ਲੜੀ ਲਈ ਰਿਸ਼ਭ ਪੰਤ ਨੂੰ ਟੀਮ ਵਿੱਚ ਥਾਂ ਦੇ ਸਕਦੇ ਹਨ। ਉਂਜ ਅਜੇ ਇਹ ਪੱਕਾ ਨਹੀਂ ਕਿ ਟੀਮ ਦੀ ਚੋਣ ਪਹਿਲੇ ਤਿੰਨ ਮੈਚਾਂ ਲਈ ਹੋਵੇਗੀ ਜਾਂ ਪੂਰੀ ਲੜੀ ਲਈ। ਸੀਮਤ ਓਵਰਾਂ ਦੇ ਗੇੜ ਦੀ ਸ਼ੁਰੂਆਤ 21 ਅਕਤੂਬਰ ਤੋਂ ਹੋਵੇਗੀ ਜਿਸ ਦੌਰਾਨ ਪੰਜ ਇਕ ਰੋਜ਼ਾ ਤੇ ਤਿੰਨ ਟੀ-20 ਕੌਮਾਂਤਰੀ ਮੈਚ ਖੇਡੇ ਜਾਣਗੇ। ਕਪਤਾਨ ਵਿਰਾਟ ਕੋਹਲੀ ’ਤੇ ਕੰਮ ਦਾ ਬੋਝ ਵੀ ਅਹਿਮ ਮੁੱਦਾ ਹੈ, ਪਰ ਇਸ ਗੱਲ ਦੇ ਆਸਾਰ ਘੱਟ ਹਨ ਕਿ ਉਸ ਨੂੰ ਪੂਰੀ ਲੜੀ ਲਈ ਆਰਾਮ ਦਿੱਤਾ ਜਾਵੇ। ਇਸ ਤੋਂ ਇਲਾਵਾ ਧੋਨੀ ਦੇ ਕਵਰ ਨੂੰ ਲੈ ਕੇ ਵੀ ਚੋਣਕਾਰਾਂ ਅਤੇ ਟੀਮ ਪ੍ਰਬੰਧਨ ਵਿਚਾਲੇ ਚਰਚਾ ਹੋ ਸਕਦੀ ਹੈ। ਧੋਨੀ ਦੀ ਵਿਕਟਕੀਪਿੰਗ ਧਾਰਦਾਰ ਹੈ, ਪਰ ਉਹਦੀ ਬੱਲੇਬਾਜ਼ੀ ਲੈਅ ਵਿੱਚ ਨਿਘਾਰ ਜ਼ਰੂਰ ਆਇਆ ਹੈ। ਚੋਣ ਮਾਮਲਿਆਂ ਦੀ ਜਾਣਕਾਰੀ ਰੱਖਣ ਵਾਲੇ ਬੀਸੀਸੀਆਈ ਦੇ ਸਿਖਰਲੇ ਅਧਿਕਾਰੀ ਨੇ ਦੱਸਿਆ, ‘ਅਸੀਂ ਜਾਣਦੇ ਹਾਂ ਕਿ ਧੋਨੀ ਵਿਸ਼ਵ ਕੱਪ ਤਕ ਖੇਡੇਗਾ, ਪਰ ਪੰਤ ਦੇ ਹੁਨਰ ਨੂੰ ਨਿਖਾਰਨ ਵਿੱਚ ਕੋਈ ਨੁਕਸਾਨ ਨਹੀਂ ਹੈ।