ਸਮ੍ਰਿਤੀ ਮੰਧਾਨਾ ਦੀ ਪਾਰੀ ਨੇ ਤੋੜੇ ਕਈ ਰਿਕਾਰਡਸ

ਨਵੀਂ ਦਿੱਲੀ – ਆਈ.ਸੀ.ਸੀ. ਮਹਿਲਾ ਟੀ-20 ਵਰਲਡ ਕੱਪ ‘ਚ ਆਸਟਰੇਲੀਆ ਨੂੰ 47 ਦੌੜਾਂ ਨਾਲ ਹਰਾ ਕੇ ਭਾਰਤ ਨੇ ਚੌਥੀ ਜਿੱਤ ਤਾਂ ਦਰਜ ਕੀਤੀ ਹੀ ਨਾਲ ਹੀ ਉਸ ਦੀ ਬੱਲੇਬਾਜ਼ ਸਮ੍ਰਿਤੀ ਮੰਧਾਨਾ ਨੇ ਵੀ ਆਪਣੇ ਬੱਲੇ ਨਾਲ ਕਈ ਰਿਕਾਰਡਸ ਬਣਾਏ। ਸਲਾਮੀ ਬੱਲੇਬਾਜ਼ ਮੰਧਾਨਾ ਨੇ ਕੰਗਾਰੂਆਂ ਦੇ ਖਿਲਾਫ 55 ਗੇਂਦਾਂ ‘ਤੇ 83 ਦੌੜਾਂ ਦੀ ਆਪਣੀ ਪਾਰੀ ‘ਚ 9 ਚੌਕੇ ਅਤੇ ਤਿੰਨ ਛੱਕੇ ਤਾਂ ਜੜੇ ਹੀ ਨਾਲ ਹੀ ਉਹ ਹੁਣ ਭਾਰਤ ਲਈ ਟੀ-20 ਕ੍ਰਿਕਟ ‘ਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਲਗਾਉਣ ਵਾਲੀ ਬੱਲੇਬਾਜ਼ ਵੀ ਬਣ ਗਈ ਹੈ।ਮੰਧਾਨਾ ਨੇ 31 ਗੇਂਦਾਂ ‘ਚ ਇਹ ਅਰਧ ਸੈਂਕੜਾ ਜੜਿਆ। ਮੰਧਾਨਾ ਨੇ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਜੜਨ ‘ਚ ਆਪਣੀ ਹੀ ਕਪਤਾਨ ਹਰਮਨਪ੍ਰੀਤ ਕੌਰ ਦਾ ਹੀ ਰਿਕਾਰਡ ਤੋੜ ਦਿੱਤਾ ਹੈ ਜੋ ਉਨ੍ਹਾਂ ਨੇ ਇਸੇ ਵਰਲਡ ਕੱਪ ਦੇ ਪਹਿਲੇ ਮੁਕਾਬਲੇ ‘ਚ ਨਿਊਜ਼ੀਲੈਂਡ ਦੇ ਖਿਲਾਫ ਬਣਾਇਆ ਸੀ। ਹਰਮਨਪ੍ਰੀਤ ਨੇ 33 ਗੇਂਦਾਂ ‘ਚ ਫਿਫਟੀ ਜੜੀ ਸੀ। ਇਸ ਪਾਰੀ ਦੇ ਨਾਲ ਹੀ ਸਮ੍ਰਿਤੀ ਮੰਧਾਨਾ ਟੀ-20 ਕ੍ਰਿਕਟ ‘ਚ 1000 ਦੌੜਾਂ ਬਣਾਉਣ ਵਾਲੀ ਤੀਜੀ ਭਾਰਤੀ ਬੱਲੇਬਾਜ਼ ਵੀ ਬਣ ਗਈ ਹੈ। ਮੰਧਾਨਾ ਤੋਂ ਪਹਿਲਾਂ ਭਾਰਤ ਲਈ ਇਹ ਕਾਰਨਾਮਾ ਮਿਤਾਲੀ ਰਾਜ ਅਤੇ ਹਰਮਨਪ੍ਰੀਤ ਕੌਰ ਨੇ ਕੀਤਾ ਹੈ।