ਸਾਇਨਾ ਮਲੇਸ਼ੀਆ ਮਾਸਟਰਜ਼ ਦੇ ਸੈਮੀ ਫਾਈਨਲ ’ਚ

ਕੁਆਲਾਲੰਪੁਰ – ਭਾਰਤੀ ਬੈਡਮਿੰਟਨ ਸਟਾਰ ਸਾਇਨਾ ਨੇਹਵਾਲ ਨੇ ਮਲੇਸ਼ੀਆ ਮਾਸਟਰਜ਼ ਦੇ ਕੁਆਰਟਰ ਫਾਈਨਲ ਵਿੱਚ ਸਾਬਕਾ ਵਿਸ਼ਵ ਚੈਂਪੀਅਨ ਨੋਜ਼ੋਮੀ ਓਕੁਹਾਰਾ ਨੂੰ ਸਖ਼ਤ ਮੁਕਾਬਲੇ ’ਚ ਹਰਾ ਕੇ ਸੈਮੀ ਫਾਈਨਲ ’ਚ ਜਗ੍ਹਾ ਪੱਕੀ ਕੀਤੀ ਜਦੋਂਕਿ ਕਿਦਾਂਬੀ ਸ੍ਰੀਕਾਂਤ ਹਾਰ ਕੇ ਬਾਹਰ ਹੋ ਗਿਆ।ਸੈਸ਼ਨ ਦੇ ਪਹਿਲੇ ਸੁਪਰ 500 ਟੂਰਨਾਮੈਂਟ ’ਚ ਸੱਤਵਾਂ ਦਰਜਾ ਪ੍ਰਾਪਤ ਸਾਇਨਾ ਨੇ ਅੱਜ ਇੱਥੇ 48 ਮਿੰਟਾਂ ਤੱਕ ਚੱਲ ਸੰਘਰਸ਼ਪੂਰਨ ਮੁਕਾਬਲੇ ਨੂੰ 21-18, 23-21 ਨਾਲ ਜਿੱਤ ਕੇ ਆਪਣੇ ਨਾਂ ਕਰ ਲਿਆ। ਇਸ ਮੈਚ ਤੋਂ ਪਹਿਲਾਂ ਦੋਵੇਂ ਖਿਡਾਰਨਾਂ ਦੀ ਜਿੱਤ ਹਾਰ ਦਾ ਰਿਕਾਰਡ 8-4 ਨਾਲ ਸਾਇਨਾ ਦੇ ਪੱਚ ’ਚ ਸੀ। ਸਾਇਨਾ ਦੋਵੇਂ ਗੇਮਾਂ ’ਚ ਵੱਡੇ ਫ਼ਰਕ ਨਾਲ ਪਿਛਡ਼ ਰਹੀ ਸੀ ਪਰ ਉਸ ਨੇ ਜ਼ੋਰਦਾਰ ਵਾਪਸੀ ਕੀਤੀ। ਸਾਇਨਾ ਪਹਿਲੇ ਗੇਮ ’ਚ ਇਕ ਸਮੇਂ 9-15 ਅਤੇ ਦੂਜੇ ਗੇਮ ’ਚ 14-18 ਨਾਲ ਪਿਛਡ਼ ਰਹੀ ਸੀ। ਹੈਦਰਾਬਾਦ ਦੀ 28 ਸਾਲਾਂ ਦੀ ਇਸ ਖਿਡਾਰਨ ਨੇ 350,000 ਅਮਰੀਕੀ ਡਾਲਰ ੲਿਨਾਮੀ ਰਾਸ਼ੀ ਵਾਲੇ ਟੂਰਨਾਮੈਂਟ ਨੂੰ 2017 ਵਿੱਚ ਜਿੱਤਿਆ ਸੀ ਅਤੇ 2011 ’ਚ ਉਪ ਜੇਤੂ ਰਹੀ ਸੀ। ਸ਼ਨਿਚਰਵਾਰ ਨੂੰ ਹੋਣ ਵਾਲੇ ਸੈਮੀ ਫਾਈਨਲ ’ਚ ਉਸ ਦਾ ਮੁਕਾਬਲਾ ਤਿੰਨ ਵਾਰ ਦੀ ਵਿਸ਼ਵ ਚੈਂਪੀਅਨ ਕੈਰੋਲੀਨਾ ਮਾਰਿਨ ਨਾਲ ਹੋਵੇਗਾ। ਸਾਇਨਾ ਨੇ ਸਪੇਨ ਦੀ ਇਸ ਖਿਡਾਰਨ ਨੂੰ ਪਿਛਲੇ 10 ਮੁਕਾਬਲਿਆਂ ’ਚੋਂ ਪੰਜ ਵਿੱਚ ਹਰਾਇਆ ਹੈ। ਉੱਧਰ, ਸ੍ਰੀਕਾਂਤ ਨੂੰ ਚੌਥਾ ਦਰਜਾ ਪ੍ਰਾਪਤ ਕੋਰੀਆ ਦੇ ਸੋਨ ਵਾਨ ਹੋ ਨੇ 21-23, 21-16, 21-17 ਨਾਲ ਹਰਾ ਦਿੱਤਾ।ਓਕੁਹਾਰਾ ਖ਼ਿਲਾਫ਼ ਸਾਇਨਾ ਦਾ ਮੁਕਾਬਲਾ ਸ਼ੁਰੂ ਹੋ ਹੀ ਕਾਫੀ ਸਖ਼ਤ ਰਿਹਾ। ਪਹਿਲੇ ਸੈੱਟ ’ਚ ਮੈਚ 9-9 ਦੀ ਬਰਾਬਰੀ ’ਤੇ ਸੀ ਉਦੋਂ ਓਕੁਹਾਰਾ ਲਗਾਤਾਰ ਛੇ ਅੰਕ ਜਿੱਤ ਕੇ ਵੱਡੇ ਫ਼ਰਕ ਨਾਲ ਅੱਗੇ ਹੋ ਗਈ ਪਰ ਸਾਇਨਾ ਨੇ ਵਾਪਸੀ ਕਰਦੇ ਹੋਏ 17-16 ਕਰ ਕੇ ਬਡ਼੍ਹਤ ਬਣਾ ਲਈ। ਮੈਚ ਇਸ ਤੋਂ ਬਾਅਦ 17-17 ਦੀ ਬਰਾਬਰੀ ’ਤੇ ਪਹੁੰਚ ਗਿਆ, ਜਿਸ ਤੋਂ ਬਾਅਦ ਭਾਰਤੀ ਖਿਡਾਰਨ ਨੇ ਜ਼ਿਆਦਾ ਮੌਕੇ ਨਹੀਂ ਦਿੱਤੇ ਅਤੇ 21-18 ਨਾਲ ਗੇਮ ਆਪਣੇ ਨਾਂ ਕਰ ਲਿਆ।