ਸ੍ਰੀਲੰਕਾ ਦੀ ਦੱਖਣੀ ਅਫਰੀਕਾ ’ਤੇ ਵੱਡੀ ਜਿੱਤ

ਕੋਲੰਬੋ, ਕਪਤਾਨ ਏਂਜਲੋ ਮੈਥਿਊਜ਼ ਦੀ 97 ਦੌੜਾਂ ਦੀ ਨਾਬਾਦ ਪਾਰੀ ਤੇ ਆਫ਼ ਸਪਿੰਨਰ ਅਕਿਲਾ ਧਨੰਜੈ ਵੱਲੋਂ ਲਈਆਂ 6 ਵਿਕਟਾਂ ਦੀ ਬਦੌਲਤ ਸ੍ਰੀਲੰਕਾ ਨੇ ਪੰਜਵੇਂ ਤੇ ਆਖਰੀ ਇਕ ਰੋਜ਼ਾ ਕੌਮਾਂਤਰੀ ਕ੍ਰਿਕਟ ਮੈਚ ਵਿੱਚ ਦੱਖਣੀ ਅਫ਼ਰੀਕਾ ਨੂੰ ਅੱਜ ਇਥੇ 178 ਦੌੜਾਂ ਦੀ ਕਰਾਰੀ ਸ਼ਿਕਸਤ ਦਿੱਤੀ। ਮੈਥਿਊਜ਼ ਦੀ 97 ਗੇਂਦਾਂ ’ਤੇ ਖੇਡੀ ਗਈ 11 ਚੌਕਿਆਂ ਤੇ ਇਕ ਛੱਕੇ ਨਾਲ ਸਜੀ ਬਿਹਤਰੀਨ ਪਾਰੀ ਤੇ ਨਿਰੋਸ਼ਨ ਡਿਕਵੇਲਾ 43, ਕੁਸਾਲ ਮੈਂਡਿਸ 38 ਤੇ ਧਨੰਜੈ ਡੀਸਿਵਲਾ 30 ਦੇ ਅਹਿਮ ਯੋਗਦਾਨ ਨਾਲ ਮੇਜ਼ਬਾਨ ਸ੍ਰੀਲੰਕਾ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਅੱਠ ਵਿਕਟਾਂ ਦੇ ਨੁਕਸਾਨ ਨਾਲ 299 ਦੌੜਾਂ ਦਾ ਚੁਣੌਤੀਪੂਰਨ ਸਕੋਰ ਬਣਾਇਆ। ਦੱਖਣੀ ਅਫ਼ਰੀਕਾ ਦੀ ਟੀਮ ਇਸ ਟੀਚੇ ਦਾ ਪਿੱਛਾ ਕਰਦਿਆਂ 24.4 ਓਵਰਾਂ ਵਿੱਚ 121 ਦੌੜਾਂ ’ਤੇ ਢੇਰ ਹੋ ਗਈ। ਮਹਿਮਾਨ ਟੀਮ ਲਈ ਕੁਇੰਟਨ ਡੀਕਾਕ ਨੇ ਸਭ ਤੋਂ ਵਧ 54 ਦੌੜਾਂ ਬਣਾਈਆਂ। ਅਕਿਲਾ ਧਨੰਜੈ ਨੇ ਨੌਂ ਓਵਰਾਂ ’ਚ 29 ਦੌੜਾਂ ਬਦਲੇ ਛੇ ਵਿਕਟ ਲਏ, ਜੋ ਉਸ ਦਾ ਇਕ ਰੋਜ਼ਾ ’ਚ ਸਰਵੋਤਮ ਪ੍ਰਦਰਸ਼ਨ ਹੈ। ਉਸ ਨੂੰ ਮੈਨ ਆਫ ਦਿ ਮੈਚ ਚੁਣਿਆ ਗਿਆ। ਹੋਰਨਾਂ ਗੇਂਦਬਾਜ਼ਾਂ ’ਚ ਲਾਹਿਰੂ ਕੁਮਾਰਾ ਨੇ ਦੋ ਅਤੇ ਸੁਰੰਗਾ ਲਕਮਲ ਤੇ ਧਨੰਜੈ ਡੀਸਿਲਵਾ ਦੇ ਹਿੱਸੇ ਹਿੱਸੇ ਇਕ ਇਕ ਵਿਕਟ ਆਈ।