ਸ੍ਰੀਲੰਕਾ ਦੀ ਸੰਸਦ ਦਾ ‘ਫ਼ੈਸਲਾਕੁਨ’ ਇਜਲਾਸ ਸੱਤ ਨੂੰ

ਕੋਲੰਬੋ – ਸ੍ਰੀਲੰਕਾ ਦੀ ਸੰਸਦ ਦੇ ਸਪੀਕਰ ਕਰੂ ਜੈਸੂਰਿਆ ਨੇ ਅੱਜ ਕਿਹਾ ਕਿ ਰਾਸ਼ਟਰਪਤੀ ਮੈਤਰੀਪਲਾ ਸ੍ਰੀਸੇਨਾ 7 ਨਵੰਬਰ ਨੂੰ ਸੰਸਦੀ ਇਜਲਾਸ ਸੱਦਣ ਲਈ ਰਾਜ਼ੀ ਹੋ ਗਏ ਹਨ। ਸਪੀਕਰ ਦੇ ਇਸ ਐਲਾਨ ਨਾਲ ਮੁਲਕ ਦੇ ਸਿਆਸੀ ਘਟਨਾਕ੍ਰਮ ਵਿਚ ਹੁਣ ਨਵਾਂ ਮੋੜ ਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਮਹਿੰਦਾ ਰਾਜਪਕਸਾ, ਰਨੀਲ ਵਿਕਰਮਸਿੰਘੇ ਨੂੰ ਹਟਾ ਕੇ ਮੁਲਕ ਦੇ ਪ੍ਰਧਾਨ ਮੰਤਰੀ ਬਣ ਗਏ ਸਨ। ਇਸ ਤੋਂ ਪਹਿਲਾਂ ਸ੍ਰੀਸੇਨਾ ਵਲੋਂ ਵੀਰਵਾਰ ਨੂੰ 16 ਨਵੰਬਰ ਤੱਕ ਇਜਲਾਸ ਮੁਅੱਤਲ ਕਰਨ ਦੇ ਐਲਾਨ ਤੋਂ ਬਾਅਦ ਸਥਿਤੀ ਭੰਬਲਭੂਸੇ ਵਾਲੀ ਬਣ ਗਈ ਸੀ। ਵਿਵਾਦਤ ਢੰਗ ਨਾਲ ਪ੍ਰਧਾਨ ਮੰਤਰੀ ਬਣੇ ਰਾਜਪਕਸਾ ਨੇ ਵੀਰਵਾਰ ਨੂੰ ਹੀ ਕਿਹਾ ਸੀ ਕਿ ਸੰਸਦੀ ਇਜਲਾਸ ਪੰਜ ਨਵੰਬਰ ਨੂੰ ਸੱਦਿਆ ਜਾਵੇਗਾ, ਪਰ ਇਸ ਨੂੰ ਬਾਅਦ ਵਿਚ ਉਨ੍ਹਾਂ ਦੇ ਸਮਰਥਕਾਂ ਨੇ ਹੀ ਖਾਰਜ ਕਰ ਦਿੱਤਾ।