ਹਾਕੀ ਖਿਡਾਰਨਾਂ ਨੇ ਮਿੱਠੇ ਤੇ ਮਿਰਚ-ਮਸਾਲੇ ਤੋਂ ਕੀਤੀ ਤੌਬਾ

‘ਮਿਸ਼ਨ ਟੋਕੀਓ’ ਓਲੰਪਿਕ ਲਈ ਆਪਣੀ ਫਿੱਟਨੈੱਸ ’ਤੇ ਧਿਆਨ ਦੇ ਰਹੀ ਭਾਰਤੀ ਮਹਿਲਾ ਹਾਕੀ ਟੀਮ ਦੀਆਂ ਖਿਡਾਰਨਾਂ ਨੇ ਮਠਿਆਈ, ਚਾਕਲੇਟ ਅਤੇ ਮਸਾਲੇਦਾਰ ਚੀਜ਼ਾਂ ਤੋਂ ਤੌਬਾ ਕਰ ਲਈ ਹੈ। ਬੀਤੇ ਦੋ ਸਾਲ ਤੋਂ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੀ ਭਾਰਤੀ ਮਹਿਲਾ ਹਾਕੀ ਟੀਮ ਨਵੰਬਰ ਵਿੱਚ ਹੋਣ ਵਾਲੇ ਓਲੰਪਿਕ ਕੁਆਲੀਫਾਇਰ ਰਾਹੀਂ ਟੋਕੀਓ ਓਲੰਪਿਕ-2020 ਦਾ ਟਿਕਟ ਕਟਾਉਣ ਲਈ ਪੂਰਾ ਜ਼ੋਰ ਲਾ ਰਹੀ ਹੈ।ਕਪਤਾਨ ਰਾਣੀ ਰਾਮਪਾਲ ਦਾ ਦਾਅਵਾ ਹੈ ਕਿ ਇਹ ਹੁਣ ਤੱਕ ਦੀ ਸਭ ਤੋਂ ਫਿੱਟ ਮਹਿਲਾ ਹਾਕੀ ਟੀਮ ਹੈ ਅਤੇ ਸਾਰੀਆਂ ਖਿਡਾਰਨਾਂ ਵਿਗਿਆਨਕ ਸਲਾਹਕਾਰ ਵੇਨ ਲੋਂਬਾਰਡ ਦੇ ‘ਡਾਇਟ ਪਲਾਨ’ ਦੀ ਇਮਾਨਦਾਰੀ ਨਾਲ ਪਾਲਣਾ ਕਰ ਰਹੀਆਂ ਹਨ। ਭਾਰਤੀ ਟੀਮ ਨੇ ਬੀਤੇ ਮਹੀਨੇ ਹੀਰੋਸ਼ੀਮਾ ਵਿੱਚ ਐੱਫਆਈਐੱਚ ਹਾਕੀ ਸੀਰੀਜ਼ ਫਾਈਨਲਜ਼ ਦਾ ਖ਼ਿਤਾਬ ਜਿੱਤਿਆ ਸੀ। ਇਸ ਮੌਕੇ ‘ਪਲੇਅਰ ਆਫ ਦਿ ਟੂਰਨਾਮੈਂਟ’ ਰਹੀ ਕਪਤਾਨ ਰਾਣੀ ਰਾਮਪਾਲ ਨੇ ਬੰਗਲੌਂਰ ਤੋਂ ਇਸ ਖ਼ਬਰ ਏਜੰਸੀ ਨੂੰ ਦੱਸਿਆ, ‘‘ਮੈਂ ਕਹਿ ਸਕਦੀ ਹਾਂ ਕਿ ਇਹ ਸਭ ਤੋਂ ਫਿੱਟ ਮਹਿਲਾ ਹਾਕੀ ਟੀਮ ਹੈ। ਵੇਨ ਲੋਂਬਾਰਡ ਨੇ ਹਰ ਖਿਡਾਰੀ ਅਤੇ ਪੂਰੀ ਟੀਮ ਦੀ ਫਿੱਟਨੈੱਸ ’ਤੇ ਕਾਫ਼ੀ ਕੰਮ ਕੀਤਾ ਹੈ। ਸਾਰੀਆਂ ਖਿਡਾਰਨਾਂ ਉਸ ਦੇ ਡਾਇਟ ਪਲਾਨ ’ਤੇ ਚੱਲ ਰਹੀਆਂ ਹਨ ਕਿਉਂਕਿ ਅਸੀਂ ਓਲੰਪਿਕ ਖੇਡਣਾ ਹੀ ਨਹੀਂ, ਸਗੋਂ ਤਗ਼ਮਾ ਵੀ ਜਿੱਤਣਾ ਹੈ।’’