ਰੌਜਰ ਫੈਡਰਰ ਤੇ ਨੋਵਾਕ ਜੋਕੋਵਿਚ ਤੀਜੇ ਦੌਰ ਵਿੱਚ ਦਾਖ਼ਲ

ਨਿਊਯਾਰਕ – ਵਿਸ਼ਵ ਦਾ ਨੰਬਰ ਦੋ ਖਿਡਾਰੀ ਸਵਿਟਜ਼ਰਲੈਂਡ ਦੇ ਰੌਜਰ ਫੈਡਰਰ ਅਤੇ ਦੋ ਵਾਰ ਦੇ ਚੈਂਪੀਅਨ ਸਰਬੀਆ ਦੇ ਨੋਵਾਕ ਜੋਕੋਵਿਚ ਨੂੰ ਸਾਲ ਦੇ ਆਖਰੀ ਗਰੈਂਡ ਸਲੈਮ ਯੂਐਸ ਓਪਨ ਦੇ ਤੀਜੇ ਦੌਰ ਵਿੱਚ ਪੁੱਜਣ ਲਈ ਖਾਸਾ ਸੰਘਰਸ਼ ਕਰਨਾ। ਉਧਰ ਮਹਿਲਾ ਵਰਗ ਵਿੱਚ ਦੂਜਾ ਦਰਜਾ ਪ੍ਰਾਪਤ ਡੈਨਮਾਰਕ ਦੀ ਕੈਰੋਲਾਈਨ ਵੋਜ਼ਨਿਆਕੀ ਦੂਜੇ ਹੀ ਦੌਰ ਵਿੱਚ ਉਲਟਫੇਰ ਦਾ ਸ਼ਿਕਾਰ ਹੋ ਗਈ। 37 ਸਾਲਾ ਫੈਡਰਰ ਨੇ ਫਰਾਂਸ ਦੇ ਬੇਨੋਇਟ ਪੀਅਰੇ ਨੂੰ ਲਗਾਤਾਰ ਸੈੱਟਾਂ ਵਿੱਚ 7-5, 6-4, 6-4 ਨਾਲ ਹਰਾਇਆ। 20 ਵਾਰ ਦੇ ਗਰੈਂਡ ਸਲੈਮ ਚੈਂਪੀਅਨ ਫੈਡਰਰ ਦਾ ਅਗਲਾ ਮੁਕਾਬਲਾ ਆਸਟਰੇਲੀਆ ਦੇ ਨਿਕ ਕਿਰਗਿਓਸ ਨਾਲ ਹੋਵੇਗਾ, ਜਿਨ੍ਹਾਂ ਇਕ ਹੋਰ ਮੁਕਾਬਲੇ ਵਿੱਚ ਫਰਾਂਸੀਸੀ ਖਿਡਾਰੀ ਪੀਅਰੇ ਹਿਊਜ ਹਰਬਟ ਨੂੰ ਹਰਾਇਆ। ਜੋਕੋਵਿਚ ਨੇ ਅਮਰੀਕਾ ਦੇ ਟੇਨੀ ਸੈਂਡਗ੍ਰੇਨ ਨੂੰ ਦੂਜੇ ਦੌਰ ਵਿੱਚ 6-1, 6-3, 6-7, 6-2 ਦੀ ਸ਼ਿਕਸਤ ਦਿੱਤੀ। ਮੈਚ ਉਪਰੰਤ ਸਰਬਿਆਈ ਖਿਡਾਰੀ ਨੇ ਕਿਹਾ, ‘ਮੈਂ ਦੋ ਸੈੱਟਾਂ ਵਿੱਚ ਚੰਗਾ ਖੇਡਿਆ, ਪਰ ਮਾਨਸਿਕ ਪੱਖੋਂ ਤੀਜਾ ਸੈੱਟ ਗੁਆ ਬੈਠਾ। ਮੈਂ ਆਪਣੀ ਲੈਅ ਤੇ ਧਿਆਨ ਗੁਆ ਬੈਠਾ, ਪਰ ਫਿਰ ਮੈਂ ਚੌਥੇ ਸੈੱਟ ਵਿੱਚ ਵਾਪਸੀ ਕੀਤੀ।’ ਛੇਵਾਂ ਦਰਜਾ ਤੇ ਇਸ ਸਾਲ ਵਿੰਬਲਡਨ ਖ਼ਿਤਾਬ ਜਿੱਤਣ ਵਾਲਾ ਜੋਕੋਵਿਚ ਹੁਣ ਅਗਲੇ ਗੇੜ ਵਿੱਚ ਫਰਾਂਸ ਦੇ ਰਿਚਰਡ ਗਾਸਕੇ ਨਾਲ ਮੱਥਾ ਲਾਏਗਾ।