ਕ੍ਰਿਕਟ ਕਪਤਾਨ ਦੀ ਖੇਡ ਹੈ, ਕੋਚ ਨੂੰ ਪਰਦੇ ਦੇ ਪਿੱਛੇ ਰਹਿਣਾ ਚਾਹੀਦਾ ਹੈ : ਗਾਂਗੁਲੀ

ਪੁਣੇ – ਭਾਰਤੀ ਟੀਮ ਦੇ ਸਾਬਕਾ ਕਪਤਾਨ ਸੌਰਵ ਗਾਂਗੁਲੀ ਨੇ ਸੋਮਵਾਰ ਨੂੰ ਇੱਥੇ ਕਿਹਾ ਕਿ ਫੁੱਟਬਾਲ ਦੇ ਉਲਟ ਕ੍ਰਿਕਟ ‘ਕਪਤਾਨ’ ਦੀ ਖੇਡ ਹੈ ਅਤੇ ਕੋਚ ਨੂੰ ‘ਪਰਦੇ ਦੇ ਪਿੱਛੇ ਤੋਂ ਕੰਮ’ ਕਰਨਾ ਚਾਹੀਦਾ ਹੈ। ਭਾਰਤੀ ਕ੍ਰਿਕਟ ਟੀਮ ਦੇ ਸਭ ਤੋਂ ਸਫਲ ਕਪਤਾਨਾਂ ‘ਚੋਂ ਇਕ 46 ਸਾਲਾ ਗਾਂਗੁਲੀ ਨੇ ਕਿਹਾ ਕਿ ਕੋਚ ਦਾ ਸਭ ਤੋਂ ਮਹੱਤਵਪੂਰਨ ਗੁਣ ‘ਖਿਡਾਰੀ ਪ੍ਰਬੰਧਨ’ ਦਾ ਹੋਣਾ ਚਾਹੀਦਾ ਹੈ। ਗਾਂਗੁਲੀ ਇੱਥੇ ਸਿੰਬੀਓਸਿਸ ਇੰਟਰਨੈਸ਼ਨਲ (ਡੀਮਡ ਯੂਨੀਵਰਸਿਟੀ) ‘ਚ ਆਪਣੀ ਕਿਤਾਬ- ‘ਏ ਸੈਂਚੁਰੀ ਇਜ਼ ਨਾਟ ਐਨਫ’ ਦੇ ਲਾਂਚ ਦੇ ਲਈ ਇੱਥੇ ਪਹੁੰਚੇ ਸਨ। ਸੀਨੀਅਰ ਖੇਡ ਲੇਖਕ ਗੌਤਮ ਭੱਟਾਚਾਰਿਆ ਇਸ ਕਿਤਾਬ ਦੇ ਸਹਿ ਲੇਖਕ ਹਨ। ਇਸ ਮੌਕੇ ‘ਤੇ ਗਾਂਗੁਲੀ ਨੇ ਭੱਟਾਚਾਰਿਆ ਦੇ ਨਾਲ ਇਕ ਪੈਨਲ ਚਰਚਾ ‘ਚ ਹਿੱਸਾ ਲਿਆ। ਭਾਰਤ ਵੱਲੋਂ 113 ਟੈਸਟ ਮੈਚ ਖੇਡਣ ਵਾਲੇ ਗਾਂਗੁਲੀ ਨੇ ਕੋਚ ਦੇ ਬਾਰੇ ‘ਚ ਪੁੱਛੇ ਗਏ ਸਵਾਲ ‘ਚ ਕਿਹਾ ਕਿ ਕੋਚ ਨੂੰ ‘ਖਿਡਾਰੀ ਪ੍ਰਬੰਧਨ’ ‘ਚ ਮਾਹਰ ਹੋਣਾ ਚਾਹੀਦਾ ਹੈ ਪਰ ”ਬਹੁਤ ਘੱਟ ਕੋਚਾਂ ‘ਚ ਅਜਿਹੀ ਕਾਬਲੀਅਤ ਹੈ।”