ICC ਮਹਿਲਾ ਚੈਂਪੀਅਨਸ਼ਿਪ ਲਈ ਸ਼੍ਰੀਲੰਕਾ ਦਾ ਦੌਰਾ ਕਰੇਗੀ ਭਾਰਤੀ ਟੀਮ

ਦੁਬਈ – ਭਾਰਤੀ ਟੀਮ ਆਈ. ਸੀ. ਸੀ. ਮਹਿਲਾ ਚੈਂਪੀਅਨਸ਼ਿਪ ਦੇ ਤੀਜੇ ਦੌਰ ਦੇ ਮੁਕਾਬਲੇ ਲਈ 11 ਤੋਂ 16 ਸਤੰਬਰ ਤੱਕ ਸ਼੍ਰੀਲੰਕਾ ਦਾ ਦੌਰਾ ਕਰੇਗੀ। ਆਈ. ਸੀ. ਸੀ. ਮਹਿਲਾ ਵਿਸ਼ਵ ਕੱਪ 2021 ਲਈ ਕੁਆਲੀਫਾਈ ਕਰਨ ਦੀ ਦੌੜ ਵਿਚ ਹੇਠਲੇ ਸਥਾਨ ‘ਤੇ ਚਲ ਰਹੀ ਸ਼੍ਰੀਲੰਕਾ, ਭਾਰਤ, ਵੈਸਟਇੰਡੀਜ਼ ਅਤੇ ਦੱਖਣੀ ਅਫਰੀਕਾ ਦੀ ਨਜ਼ਰ ਚੋਟੀ 4 ਵਿਚ ਚਲ ਰਹੇ ਆਸਟਰੇਲੀਆ, ਇੰਗਲੈਂਡ, ਪਾਕਿਸਤਾਨ ਅਤੇ ਨਿਊਜ਼ੀਲੈਂਡ ਦੇ ਕਰੀਬ ਪਹੁੰਚਣ ‘ਤੇ ਟਿਕੀ ਹੈ। ਆਈ. ਸੀ. ਸੀ. ਮਹਿਲਾ ਵਿਸ਼ਵ ਕੱਪ 2017 ਦੇ ਫਾਈਨਲ ਵਿਚ ਜਗ੍ਹਾ ਬਣਾਉਣ ਵਾਲੀ ਭਾਰਤੀ ਟੀਮ 6 ਮੈਚਾਂ ਵਿਚ 4 ਅੰਕ ਦੇ ਨਾਲ ਅੰਕ ਸੂਚੀ ਵਿਚ 6ਵੇਂ ਸਥਾਨ ‘ਤੇ ਚਲ ਰਹੀ ਹੈ। ਟੀਮ ਨੇ ਦੋਵੇਂ ਜਿੱਤਾਂ ਦੱਖਣੀ ਅਫਰੀਕਾ ਖਿਲਾਫ ਜਿੱਤੀਆਂ। ਸ਼੍ਰੀਲੰਕਾ ਦੀ ਟੀਮ ਪਾਕਿਸਤਾਨ ਅਤੇ ਵੈਸਟਇੰਡੀਜ਼ ਖਿਲਾਫ ਸੀਰੀਜ਼ ਖੇਡਣ ਤੋਂ ਬਾਅਦ ਕੋਈ ਅੰਕ ਨਹੀਂ ਬਟੋਰ ਸਕੀ। ਸ਼੍ਰੀਲੰਕਾ ਦੀ ਟੀਮ 11 ਤੋਂ 16 ਸਤੰਬਰ ਤੱਕ ਹੋਣ ਵਾਲੀ ਸੀਰੀਜ਼ ਵਿਚ ਭਾਰਤ ਦੀ ਮੇਜ਼ਬਾਨੀ ਕਰੇਗੀ। ਇਹ ਸੀਰੀਜ਼ ਦੋਵੇਂ ਟੀਮਾਂ ਲਈ ਕਾਫੀ ਮਹੱਤਪੂਰਨ ਹੈ। ਘਰੇਲੂ ਜ਼ਮੀਨ ‘ਤੇ ਆਸਟਰੇਲੀਆ ਦੇ ਹੱਥੋਂ ਹਾਰਨ ਤੋਂ ਬਾਅਦ ਇਹ ਭਾਰਤ ਦੇ ਕੋਲ ਵਾਪਸੀ ਕਰਨ ਦਾ ਮੌਕਾ ਹੈ ਜਦਕਿ ਸ਼੍ਰੀਲੰਕਾ ਦੀ ਟੀਮ ਖਾਤਾ ਖੋਲਣ ਦੇ ਇਰਾਦੇ ਨਾਲ ਉਤਰੇਗੀ ਅਤੇ ਟੂਰਨਾਮੈਂਟ ਦੇ ਪਿਛਲੇ ਸੀਜ਼ਨ ਵਿਚ ਭਾਰਤ ਖਿਲਾਫ 0-3 ਦੀ ਹਾਰ ਨੂੰ ਭੁਲਾਉਣਾ ਚਾਹੇਗੀ। ਭਾਰਤੀ ਕਪਤਾਨ ਮਿਤਾਲੀ ਰਾਜ ਨੇ ਕਿਹਾ, ” ਅਸੀਂ ਯਕੀਨੀ ਤੌਰ ‘ਤੇ ਆਪਣੀ ਸਮਰੱਥਾ ਦੇ ਮੁਤਾਬਕ ਖੇਡਣਗੇ ਜਿਸ ਨਾਲ ਕਿ ਸ਼੍ਰੀਲੰਕਾ ਖਿਲਾਫ ਸੀਰੀਜ਼ ਤੋਂ ਵੱਧ ਅੰਕ ਬਟੋਰ ਸਕਣ। ਆਈ. ਸੀ. ਸੀ. ਮਹਿਲਾ ਚੈਂਪੀਅਨਸ਼ਿਪ ਵਿਚ ਸਾਰੀਆਂ 8 ਟੀਮਾਂ ਘਰੇਲੂ ਅਤੇ ਵਿਰੋਧੀ ਮੈਦਾਨਾਂ ‘ਤੇ 3-3 ਵਨ ਡੇ ਅੰਤਰਰਾਸ਼ਟਰੀ ਸੀਰੀਜ਼ ਖੇਡੇਗੀ। ਵਨ ਡੇ ਮੈਚਾਂ ਤੋਂ ਬਾਅਦ ਸਰਦੀਆਂ ਵਿਚ ਹੋਣ ਵਾਲੀ ਮਹਿਲਾ ਵਿਸ਼ਵ ਟੀ-20 ਦੀ ਤਿਆਰੀ ਲਈ ਕਈ ਟੀ-20 ਅੰਤਰਰਾਸ਼ਟਰੀ ਮੈਚ ਖੇਡੇ ਜਾਣਗੇ।