ਚੀਨ ਨੂੰ ਕੋਈ ‘ਚਿਤਾਵਨੀ’ ਨਹੀਂ ਦੇ ਸਕਦਾ: ਜਿਨਪਿੰਗ

ਪੇਈਚਿੰਗ – ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਮੁਲਕ ਨੂੰ ਕੀ ਕਰਨਾ ਚਾਹੀਦਾ ਹੈ ਤੇ ਕੀ ਨਹੀਂ, ਇਸ ਬਾਰੇ ਕੋਈ ‘ਹੁਕਮ’ ਜਾਰੀ ਨਹੀਂ ਕਰ ਸਕਦਾ। ਕਮਿਊਨਿਸਟ ਮੁਲਕ ਵਿਚ ਹੋਏ ਨੀਤੀਗਤ ਸੁਧਾਰਾਂ ਦੀ 40ਵੀਂ ਵਰ੍ਹੇਗੰਢ ਮੌਕੇ ਜਿਨਪਿੰਗ ਨੇ 80 ਮਿੰਟ ਲੰਮਾ ਭਾਸ਼ਨ ਦਿੱਤਾ। ਹਾਲਾਂਕਿ ਇਸ ਦੌਰਾਨ ਉਨ੍ਹਾਂ ਸੱਤਾਧਾਰੀ ਕਮਿਊਨਿਸਟ ਪਾਰਟੀ ਵੱਲੋਂ ਮੁਲਕ ਦੇ ਸਿਆਸੀ ਢਾਂਚੇ ’ਤੇ ਬਣਾਈ ਮਜ਼ਬੂਤ ਪਕੜ ’ਚ ਕਿਸੇ ਵੀ ਤਰ੍ਹਾਂ ਦੀ ਢਿੱਲ ਦਾ ਸੰਕੇਤ ਨਹੀਂ ਦਿੱਤਾ। ਇਸ ਤੋਂ ਇਲਾਵਾ ਰਾਸ਼ਟਰਪਤੀ ਨੇ ਚੀਨ ਦੀਆਂ ਵਿੱਤੀ ਮੁਸ਼ਕਲਾਂ ਦੇ ਹੱਲ ਲਈ ਕਰੜੀਆਂ ਆਰਥਿਕ ਨੀਤੀਆਂ ਵਿਚ ਰਾਹਤ ਦੇਣ ਬਾਰੇ ਵੀ ਕੁਝ ਨਹੀਂ ਕਿਹਾ। ਜ਼ਿਕਰਯੋਗ ਹੈ ਕਿ ਵਪਾਰਕ ਨੀਤੀਆਂ ਨੂੰ ਲੈ ਕੇ ਅਮਰੀਕਾ ਤੇ ਚੀਨ ਵਿਚਾਲੇ ਆਲਮੀ ਪੱਧਰ ’ਤੇ ਟਕਰਾਅ ਦਾ ਮਾਹੌਲ ਬਣਿਆ ਹੋਇਆ ਹੈ। ਪੇਈਚਿੰਗ ਦੇ ਪ੍ਰਸਿੱਧ ਗਰੇਟ ਹਾਲ ਆਫ਼ ਪੀਪਲਜ਼ ਵਿਚ ਹੋਏ ਭਰਵੇਂ ਸਮਾਗਮ ਦੌਰਾਨ ਸ਼ੀ ਜਿਨਪਿੰਗ ਨੇ ਚੀਨ ਦੇ ਨਾਗਰਿਕਾਂ ਨੂੰ ‘ਮਿਹਨਤੀ, ਬੁੱਧੀਮਾਨ ਤੇ ਬਹਾਦਰ’ ਦੱਸਦਿਆਂ ਉਨ੍ਹਾਂ ਦੀ ਸਿਫ਼ਤ ਕੀਤੀ। ਜਿਨਪਿੰਗ ਨੇ ਕਿਹਾ ਕਿ ਆਉਣ ਵਾਲੇ ਵਰ੍ਹਿਆਂ ਵਿਚ ਚੀਨ ਦੀ ਆਰਥਿਕਤਾ ‘ਅਜਿਹੇ ਚਮਤਕਾਰ ਕਰੇਗੀ’ ਕਿ ਦੁਨੀਆ ਹੈਰਾਨ ਰਹਿ ਜਾਵੇਗੀ।