ਇਟਲੀ ਵਿੱਚ ਦੋ ਟਰੱਕਾਂ ਦੀ ਜ਼ਬਰਦਸਤ ਟੱਕਰ ਵਿੱਚ ਇੱਕ ਦੀ ਮੌਤ, ਇੱਕ ਗੰਭੀਰ ਜ਼ਖਮੀ

ਇਟਲੀ ਦੇ ਸ਼ਹਿਰ ਫਿਰੈਸਾ ਤੇ ਬੋਰਗੋ ਪਨੀਗਾਲੇ ਰੋਡ ਏ 14 ਤੇ ਦੋ ਟਰੱਕਾਂ ਦੀ ਆਪਸੀ ਟੱਕਰ ਹੋ ਜਾਣ ਕਾਰਨ ਇੱਕ ਵਿਅਕਤੀ ਦੀ ਮੌਤ ਹੋ ਗਈ| ਜਾਣਕਾਰੀ ਅਨੁਸਾਰ ਏ 14 ਰੋਡ ਦੇ ਬੋਰਗੋ ਪਨੀਗਾਲੇ ਜੰਕਸ਼ਨ ਤੇ ਕੱਲ ਦੁਪਿਹਰ ਦੋ ਟਰੱਕਾਂ ਵਿੱਚ ਆਪਸੀ ਟੱਕਰ ਹੋ ਗਈ, ਜਿਸ ਕਾਰਨ ਇੱਕ ਟਰੱਕ ਡਰਾਈਵਰ ਦੀ ਘਟਨਾ ਸਥਲ ਉੱਤੇ ਹੀ ਅੱਗ ਲੱਗਣ ਕਾਰਨ ਮੌਤ ਹੋ ਗਈ ਜਦੋਂ ਕਿ ਦੂਜਾ ਗੰਭੀਰ ਜਖ਼ਮੀ ਹੋ ਗਿਆ| ਮ੍ਰਿਤਕ ਦੀ ਪਛਾਣ ਤਰਵੀਜੋ ਜ਼ਿਲ੍ਹੇ ਦੇ ਵਾਸਨੀਕ 68 ਸਾਲਾ ਗਓਰਗੇ ਪਨਤੇਆ ਮੋਗਲਨ ਵਜੋਂ ਹੋਈ, ਜੋ ਆਪਣੇ ਪਿੱਛੇ ਪਤਨੀ ਅਤੇ 5 ਬੱਚੇ ਛੱਡ ਗਿਆ ਹੈ| ਇੱਕ ਟਰੱਕ ਵਿੱਚ ਕੈਮੀਕਲ ਪਦਾਰਥ ਸਨ ਜਿਸ ਕਾਰਨ ਸੜਕ ਤੇ ਭਿਆਨਕ ਅੱਗ ਲੱਗ ਗਈ ਤੇ ਕਈ ਹੋਰ ਵਾਹਨ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ| ਕਰਮਚਾਰੀਆਂ ਨੇ ਕਾਫ਼ੀ ਜੱਦੋਂ-ਜਹਿਦ ਦੇ ਬਾਅਦ ਅੱਗ ਤੇ ਕਾਬੂ ਪਾਇਆ| ਇਸ ਕਾਰਨ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ| ਹਾਦਸਾ ਉਦੋਂ ਹੋਇਆ ਜਦੋਂ ਮੋਗਲਨ ਆਪਣੇ ਟੱਰਕ ਨੂੰ ਖਾਲੀ ਕਰਕੇ ਘਰ ਨੂੰ ਜਾ ਰਿਹਾ ਸੀ|