ਦੁਨੀਆ ਦਾ ਸਭ ਤੋਂ ਤਾਕਤਵਰ ਦੇਸ਼ ਅਮਰੀਕਾ ਚੂਹਿਆਂ ਅੱਗੇ ਲਾਚਾਰ, ਵ੍ਹਾਈਟ ਹਾਊਸ ਵੀ ਪਰੇਸ਼ਾਨ

ਵਾਸ਼ਿੰਗਟਨ – ਦੁਨੀਆ ਦਾ ਸਭ ਤੋਂ ਤਾਕਤਵਰ ਦੇਸ਼ ਅਮਰੀਕਾ ਚੂਹਿਆਂ ਦੀ ਪਰੇਸ਼ਾਨੀ ਨਾਲ ਨਜਿੱਠ ਰਿਹਾ ਹੈ| ਅਮਰੀਕਾ ਦੀ ਰਾਜਧਾਨੀ ਵਾਸ਼ਿੰਗਟਨ ਵਿੱਚ ਚੂਹਿਆਂ ਨੂੰ ਹਰ ਪਾਸੇ ਦੇਖਿਆ ਜਾ ਸਕਦਾ ਹੈ| ਚੂਹਿਆਂ ਨੂੰ ਵਾਸ਼ਿੰਗਟਨ ਸ਼ਹਿਰ ਦੀਆਂ ਗਲੀਆਂ ਵਿੱਚ ਘੁੰਮਦੇ ਹੋਏ ਅਤੇ ਖਾਣੇ ਦੀ ਭਾਲ ਵਿੱਚ ਕੂੜੇਦਾਨ ਦੇ ਆਲੇ-ਦੁਆਲੇ ਮੰਡਰਾਉਂਦੇ ਦੇਖਿਆ ਜਾਣਾ ਇਕ ਆਮ ਗੱਲ ਹੈ| ਵਾਸ਼ਿੰਗਟਨ ਡੀ. ਸੀ. ਵਿੱਚ ਔਸਤਨ ਹਰ 5 ਫੁੱਟ ਦੀ ਦੂਰੀ ਤੇ ਇਕ ਚੂਹਾ ਦਿਖਾਈ ਦਿੰਦਾ ਹੈ| ਚੂਹੇ ਖਾਣੇ ਦੀ ਭਾਲ ਵਿੱਚ ਆਪਣੀਆਂ ਖੁੱਡਾਂ ਵਿੱਚੋਂ ਬਾਹਰ ਨਿਕਲ ਜਾਂਦੇ ਹਨ| ਹੁਣ ਇਹ ਚੂਹੇ ਵ੍ਹਾਈਟ ਹਾਊਸ ਦੇ ਕੰਪਲੈਕਸ ਤੱਕ ਪਹੁੰਚ ਚੁੱਕੇ ਹਨ| ਇਹ ਦੂਜਾ ਮੌਕਾ ਹੈ ਜਦੋਂ ਅਮਰੀਕਾ ਵਿੱਚ ਚੂਹਿਆਂ ਦੀ ਚਰਚਾ ਹੈ| ਇਸ ਤੋਂ ਪਹਿਲਾਂ ਸਾਲ 2015 ਵਿੱਚ ਨਿਊਯਾਰਕ ਸ਼ਹਿਰ ਦੀ ਭੀੜ ਭਰੀ ਸੜਕ ਤੇ ਲੋਕਾਂ ਨੇ ਚੂਹੇ ਨੂੰ ਪਿੱਜ਼ਾ ਖਾਂਦੇ ਹੋਏ ਦੇਖਿਆ ਸੀ| ਉਸ ਸਮੇਂ ਇਸ ਘਟਨਾ ਦੀ ਕਾਫੀ ਚਰਚਾ ਹੋਈ ਸੀ| ਲੋਕਾਂ ਨੇ ਇਸ ਨੂੰ ਪਿੱਜ਼ਾ ਰੈਟ ਦਾ ਨਾਂ ਦਿੱਤਾ ਸੀ| ਦੱਸ ਦਈਏ ਕਿ ਡੀ. ਸੀ. ਦਾ ਹੈਲਥ ਡਿਪਾਰਟਮੈਂਟ ਚੂਹਿਆਂ ਨਾਲ ਨਜਿੱਠਣ ਲਈ ਕਾਫੀ ਵੱਡੀ ਰਕਮ ਖਰਚ ਕਰਦਾ ਹੈ ਪਰ ਇਸ ਦੇ ਬਾਵਜੂਦ ਚੂਹਿਆਂ ਤੇ ਕਾਬੂ ਨਹੀਂ ਪਾਇਆ ਜਾ ਰਿਹਾ| ਅਜਿਹਾ ਲੱਗਦਾ ਹੈ ਕਿ ਚੂਹਿਆਂ ਨਾਲ ਨਜਿੱਠਣ ਲਈ ਅਮਰੀਕਾ ਨੂੰ ਕੋਈ ਰਣਨੀਤੀ ਬਣਾਉਣੀ ਪਵੇਗੀ|