ਬੱਚਿਆਂ ਦਾ ਯੌਨ ਸ਼ੋਸ਼ਣ ਮਨੁੱਖੀ ਬਲੀ ਦੇਣ ਦੇ ਬਰਾਬਰ : ਪੋਪ ਫ੍ਰਾਂਸਿਸ

ਵੈਟੀਕਨ ਸਿਟੀ – ਵੈਟੀਕਨ ਸਿਟੀ ਵਿਚ ਪੋਪ ਫ੍ਰਾਂਸਿਸ ਨੇ ਬੱਚਿਆਂ ਦੇ ਯੌਨ ਸ਼ੋਸ਼ਣ ਤੇ ਕਾਫੀ ਸਖਤ ਬਿਆਨ ਦਿੱਤਾ| ਉਨ੍ਹਾਂ ਨੇ ਇਸ ਨੂੰ ਮਨੁੱਖੀ ਬਲੀ ਕਰਾਰ ਦਿੱਤਾ| ਪੋਪ ਬੱਚਿਆਂ ਦੇ ਯੌਨ ਸ਼ੋਸ਼ਣ ਦੀ ਸਮੱਸਿਆ ਨਾਲ ਨਜਿੱਠਣ ਲਈ ਆਯੋਜਿਤ 4 ਦਿਨੀਂ ਮਹੱਤਵਪੂਰਣ ਸੰਮੇਲਨ ਦੇ ਆਖਰੀ ਦਿਨ ਵਿਚ ਸੀਨੀਅਰ ਬਿਸ਼ਪਾਂ ਨੂੰ ਸੰਬੋਧਿਤ ਕਰ ਰਹੇ ਸਨ| ਬੀਤੇ ਕੁਝ ਸਾਲਾਂ ਵਿਚ ਚਰਚ ਵਿਚ ਬੱਚਿਆਂ ਨਾਲ ਯੌਨ ਸ਼ੋਸ਼ਣ ਅਤੇ ਨਨਜ਼ ਤੇ ਔਰਤਾਂ ਨਾਲ ਯੌਨ ਸ਼ੋਸ਼ਣ ਦੀਆਂ ਘਟਨਾਵਾਂ ਤੇ ਪੂਰੇ ਵਿਸ਼ਵ ਵਿਚ ਗੁੱਸਾ ਦੇਖਣ ਨੂੰ ਮਿਲਿਆ ਹੈ| ਚਰਚ ਵਿਚ ਹੋਣ ਵਾਲੇ ਇਨ੍ਹਾਂ ਅਪਰਾਧਾਂ ਨੂੰ ਰੋਕਣ ਅਤੇ ਲੋਕਾਂ ਦਾ ਵਿਸ਼ਵਾਸ ਮੁੜ ਬਹਾਲ ਕਰਨ ਦੇ ਉਦੇਸ਼ ਨਾਲ ਇਹ ਕਾਨਫਰੰਸ ਆਯੋਜਿਤ ਕੀਤੀ ਗਈ| ਚਾਰ ਦਿਨੀਂ ਕਾਨਫਰੰਸ ਦੀ ਸਮਾਪਤੀ ਤੇ ਪੋਪ ਨੇ ਕਿਹਾ,”ਸਾਡੇ ਕੰਮ ਨੇ ਇਕ ਵਾਰ ਫਿਰ ਸਾਨੂੰ ਬੱਚਿਆਂ ਦੇ ਯੌਨ ਸ਼ੋਸ਼ਣ ਦੀ ਬੁਰਾਈ ਦੀ ਗੰਭੀਰਤਾ ਦਾ ਅਹਿਸਾਸ ਕਰਵਾਇਆ ਹੈ| ਇਤਿਹਾਸਿਕ ਰੂਪ ਨਾਲ ਇਹ ਬੁਰਾਈ ਸਾਰੇ ਸੱਭਿਆਚਾਰਾਂ ਅਤੇ ਸਮਾਜਾਂ ਵਿਚ ਮੌਜੂਦ ਰਹੀ ਹੈ|” ਉਨ੍ਹਾਂ ਨੇ ਬੱਚਿਆਂ ਦੇ ਸ਼ੋਸ਼ਣ ਦੀ ਤੁਲਨਾ ਮਨੁੱਖੀ ਬਲੀ ਨਾਲ ਕਰਦਿਆਂ ਕਿਹਾ,”ਮੈਨੂੰ ਬੇਰਹਿਮੀ ਵਾਲੀਆਂ ਧਾਰਮਿਕ ਪਰੰਪਰਾਵਾਂ ਦੇ ਬਾਰੇ ਵਿੱਚ ਯਾਦ ਹੈ ਜੋ ਕਦੇ ਕੁਝ ਸੱਭਿਆਚਾਰਾਂ ਵਿਚ ਫੈਲੀਆਂ ਸਨ| ਮਨੁੱਖੀ ਬਲੀ ਦੀ ਪ੍ਰਥਾ, ਖਾਸ ਕਰ ਕੇ ਬੱਚਿਆਂ, ਗੈਰ ਈਸਾਈ ਪੰਰਪਰਾਵਾਂ ਵਿੱਚ| ਜਿਹੜੇ ਪਾਦਰੀ ਬੱਚਿਆਂ ਨੂੰ ਸ਼ਿਕਾਰ ਬਣਾਉਂਦੇ ਹਨ, ਉਹ ਸ਼ੈਤਾਨ ਦਾ ਰੂਪ ਹਨ| ਇਸ ਬੁਰਾਈ ਤੇ ਧਿਆਨ ਦੇਣਾ ਸਾਡੀ ਜ਼ਿੰਮੇਵਾਰੀ ਹੈ|”