ਮੇਰੀ ਕੌਮ ਨੇ ਪਹਿਲੇ ਬਾਊਟ ’ਚ ਤਗ਼ਮਾ ਪੱਕਾ ਕੀਤਾ

ਛੇ ਵਾਰ ਦੀ ਵਿਸ਼ਵ ਚੈਂਪੀਅਨ ਐਮਸੀ ਮੇਰੀਕੌਮ ਨੇ 51 ਕਿਲੋ ਭਾਰ ਵਰਗ ਵਿੱਚ ਸ਼ਾਨਦਾਰ ਵਾਪਸੀ ਕਰਦਿਆਂ ਦੂਜੇ ਇੰਡੀਆ ਓਪਨ ਵਿੱਚ ਅੱਜ ਇੱਥੇ ਨੇਪਾਲ ਦੀ ਮਾਲਾ ਰਾਏ ਨੂੰ ਹਰਾ ਕੇ ਸੈਮੀ-ਫਾਈਨਲ ਵਿੱਚ ਪਹੁੰਚਣ ਦੇ ਨਾਲ ਤਗ਼ਮਾ ਵੀ ਪੱਕਾ ਕਰ ਲਿਆ। ਲੰਡਨ ਓਲੰਪਿਕ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਣ ਵਾਲੀ ਇਸ ਮੁੱਕੇਬਾਜ਼ ਤੋਂ ਇਲਾਵਾ ਦੂਜੇ ਭਾਰਤੀ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਇੱਥੋਂ ਦੇ ਕਰਮਬੀਰ ਨਵੀਨ ਚੰਦਰ ਬੋਰਦੋਲੋਈ ਇੰਡੋਰ ਸਟੇਡੀਅਮ ਦੇ ਰਿੰਗ ਵਿੱਚ ਪਹੁੰਚਦੇ ਹੀ ਦਰਸ਼ਕਾਂ ਨੇ ਇਸ ਸਟਾਰ ਖਿਡਾਰਨ ਦਾ ਰੌਲੇ-ਰੱਪੇ ਨਾਲ ਸਵਾਗਤ ਕੀਤਾ। ਉਸ ਨੇ ਮਾਲਾ ਰਾਏ ਨੂੰ ਬਿਨਾਂ ਕੋਈ ਮੌਕਾ ਦਿੱਤੇ ਪਹਿਲੇ ਬਾਊਟ ਵਿੱਚ 5-0 ਨਾਲ ਮਾਤ ਦਿੱਤੀ। ਦਿਲਚਸਪ ਗੱਲ ਇਹ ਸੀ ਕਿ ਨੇਪਾਲ ਦੀ ਖਿਡਾਰਨ ਹਾਰ ਦੇ ਬਾਵਜੂਦ ਮੁਸਕਰਾਉਂਦਿਆਂ ਹੋਇਆ ਉਸ ਨੂੰ ਗਲੇ ਲੱਗ ਕੇ ਮਿਲੀ। ਸੈਮੀ-ਫਾਈਨਲ ਵਿੱਚ ਮੇਰੀਕੌਮ ਦਾ ਸਾਹਮਣਾ ਏਸ਼ਿਆਈ ਚੈਂਪੀਅਨਸ਼ਿਪ ਦੀ ਕਾਂਸੀ ਦਾ ਤਗ਼ਮਾ ਜੇਤੂ ਨਿਖਤ ਜ਼ਰੀਨ ਨਾਲ ਹੋਵੇਗਾ। ਸਟਰਾਂਜ਼ਾ ਕੱਪ ਦੀ ਸੋਨ ਤਗ਼ਮਾ ਜੇਤੂ ਨਿਖਤ ਨੇ ਅਨਾਮਿਕਾ ਨੂੰ 5-0 ਨਾਲ ਹਰਾਇਆ। ਮੰਜੂ ਰਾਣੀ (48 ਕਿਲੋ) ਨੇ ਫਿਲਪੀਨਜ਼ ਦੀ ਮੁੱਕੇਬਾਜ਼ ਨੂੰ ਪਹਿਲੇ ਹੀ ਰਾਊਂਡ ਵਿੱਚ ਹਰਾ ਦਿੱਤਾ। ਉਹ ਇਸ ਜਿੱਤ ਨਾਲ ਸੈਮੀ-ਫਾਈਨਲ ਵਿੱਚ ਪਹੁੰਚ ਗਈ। ਮੋਨਿਕਾ ਨੇ ਵੀ ਥਾਈਲੈਂਡ ਦੀ ਮੁੱਕੇਬਾਜ਼ ਨੂੰ ਮਾਤ ਦਿੱਤੀ। ਕਲਾਵਾਨੀ ਨੂੰ ਭੂਟਾਨ ਦੀ ਟੰਡਿਨ ਲਹਾਮੋ ਖ਼ਿਲਾਫ਼ ਦੂਜੇ ਗੇੜ ਵਿੱਚ ਆਰਐਸਸੀ ਨਾਲ ਜੇਤੂ ਐਲਾਨਿਆ ਗਿਆ ਸੀ, ਜਦਕਿ ਨੀਤੂ ਨੂੰ ਹਾਰ ਝੱਲਣੀ ਪਈ। ਉਸ ਨੂੰ ਫਿਲਪੀਨਜ਼ ਦੀ ਸਾਬਕਾ ਵਿਸ਼ਵ ਚੈਂਪੀਅਨ ਜੋਸੀ ਗੇਬੁਕੋ ਨੇ 5-0 ਨਾਲ ਹਰਾਇਆ।