ਐਂਡੀ ਮੱਰੇ ਸਿਟੀ ਓਪਨ ਦੇ ਕੁਆਰਟਰ ਫਾਈਨਲ ’ਚ

ਵਾਸ਼ਿੰਗਟਨ – ਦੁਨੀਆ ਦਾ ਸਾਬਕਾ ਅੱਵਲ ਨੰਬਰ ਟੈਨਿਸ ਖਿਡਾਰੀ ਐਂਡੀ ਮੱਰੇ ਰੋਮਾਨੀਆ ਦੇ ਮਾਰੀਅਸ ਕੋਪਿਲ ਨੂੰ ਹਰਾ ਕੇ ਸਿਟੀ ਓਪਨ ਦੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਗਿਆ ਹੈ। ਵਿਸ਼ਵ ਦਰਜਾਬੰਦੀ ਵਿੱਚ 832ਵੇਂ ਸਥਾਨ ’ਤੇ ਕਾਬਜ਼ ਮੱਰੇ ਨੇ ਇਸ ਏਟੀਪੀ ਤੇ ਡਬਲਯੂਟੀਏ ਟੂਰਨਾਮੈਂਟ ਵਿੱਚ 93ਵੇਂ ਰੈਂਕਿੰਗ ਵਾਲੇ ਖਿਡਾਰੀ ਨੂੰ 6-7, 6-3, 7-6 ਨਾਲ ਸ਼ਿਕਸਤ ਦਿੱਤੀ। ਤਿੰਨ ਗਰੈਂਡ ਸਲੈਮ ਖ਼ਿਤਾਬ ਜੇਤੂ ਮੱਰੇ ਮੀਂਹ ਤੋਂ ਪ੍ਰਭਾਵਿਤ ਇਸ ਮੈਚ ਦੇ ਪਹਿਲੇ ਸੈੱਟ ਵਿੱਚ 5-0 ਨਾਲ ਅੱਗੇ ਸੀ, ਪਰ ਉਸ ਨੇ ਲਗਾਤਾਰ ਸੱਤ ਅੰਕ ਗੁਆ ਲਏ ਅਤੇ ਕੋਪਿਲ ਨੇ ਇਹ ਸੈੱਟ 7-6 ਨਾਲ ਆਪਣੇ ਨਾਮ ਕਰ ਲਿਆ। ਮੱਰੇ ਨੇ ਦੂਜੇ ਸੈੱਟ ਵਿੱਚ ਆਸਾਨੀ ਨਾਲ 6-3 ਨਾਲ ਜਿੱਤ ਦਰਜ ਕੀਤੀ। ਤੀਜੇ ਸੈੱਟ ਵਿੱਚ ਹਾਲਾਂਕਿ ਉਸ ਨੂੰ ਸਖ਼ਤ ਟੱਕਰ ਮਿਲੀ, ਪਰ ਤਜਰਬੇ ਦਾ ਫ਼ਾਇਦਾ ਚੁੱਕ ਕੇ ਉਸ ਨੇ ਕੋਪਿਲ ਨੂੰ ਚਿੱਤ ਕਰ ਦਿੱਤਾ। ਮੱਰੇ ਸੈਮੀ ਫਾਈਨਲ ਵਿੱਚ ਥਾਂ ਪੱਕੀ ਕਰਨ ਲਈ ਆਸਟਰੇਲੀਆ ਦੇ 19 ਸਾਲ ਦੇ ਅਲੈਕਸ ਡਿ ਮਿਨੌਰ ਨਾਲ ਭਿੜੇਗਾ।